Тошкент шаҳри Чилонзор туманида жойлашган Адиблар хиёбонига ташриф буюрганларнинг буюмларини талон-торож қилган тўрт нафар шахс қўлга олинди. Уларнинг бири 16 ёшли қиз. Бу ҳақда Тергов департаменти хабар қилди.
Маълум қилинишича, 2021 йилнинг 16 май куни тунги соат 22:00 ларда бир нечта номаълум шахслар Тошкент шаҳар Чилонзор туманида жойлашган Адиблар хиёбонидаги ўриндиқда ўтирган фуқаролар 19 ёшли А.О. ҳамда Р.М. исмли қизнинг ёнига келиб, А.О. исмли йигитнинг фаол қаршилик қилишига қарамай, унинг чўнтагидаги ҳамёнини очиқдан-очиқ талон-торож қилиб, ҳодиса жойидан қочаётганларида ушбу ҳудудда хизмат олиб бораётган қўриқлаш хизмати ходимлари томонидан қўлга олинган.
Терговга қадар текширув ҳаракатлари давомида ушбу жиноятни 20 ёшли И.Д., 22 ёшли Р.А., 19 ёшли О.М. исмли йигитлар ва 16 ёшли Х.Ш. исмли қиз содир қилганлиги аниқланган.
Мазкур ҳолат юзасидан Чилонзор тумани бўйича ИИО ФМБ ҳузуридаги тергов бўлинмаси томонидан Жиноят кодексининг 166-моддаси (талончилик) билан жиноят иши қўзғатилган.
Тергов ҳаракатлари жараёнида ушбу гумон қилинувчи шахслар 2021 йилнинг 16 май куни соат 12:00 ларда мазкур Адиблар хиёбонида бўлган фуқаро 22 ёшли Т.Ш. исмли йигит ва унинг таниши 16 ёшли М.А. исмли қизнинг ёнига келиб, уларга тегишли 2 500 000 сўмлик Samsung А51 ва нархи 2 000 000 сўмлик Samsung А02S русумли телефон аппаратларини очиқдан-очиқ талон-торож қилганлиги аниқланган.
Жиноят иши доирасида И.Д., Р.А., О.М. ва Х.Ш.нинг бошқа жиноятларга алоқадорликлари аниқланиб, ҳуқуқий баҳо берилиши таъминланиши маълум қилинган.
Бундан аввал Яшнободда 17 ёшли йигит 61 ёшли аёлнинг телефони ва 1,2 миллион сўм пулларини талон-торож қилгани, Андижонда икки шахсга зўрлик ишлатиб, пули ва телефонини олиб қўйган аёл ушлангани ҳамда Бухорода ўзига нотаниш фуқарога спиртли ичимлик ичишни таклиф қилиб, уни дўппослаган ва тўнаган шахсга суд ҳукми ўқилгани ҳақида хабар берилганди.
Изоҳ (0)