Apple ходими Майкл Шмид компания Fortnite онлайн ўйини ортидан камида 100 миллион доллар ишлаб топганини маълум қилди. Ушбу маълумотлар Apple ҳамда Epic Games ўртасидаги антимонопол суд можаролари вақтида аниқланган, деб хабар беради IXBT.
App Store’даги бизнеснинг ривожланишига масъул бўлган Шмид Окленд федерал судида сўроқ қилинди. У ўйин ортидан келган даромад 200 миллион доллардан ошганини маълум қилишдан бош тортиб, бу каби маълумот билан бўлишиш ноўрин эканлигини таъкидлаган.
Fortnite App Store’да 2018 йилда ишга тушган, 2020 йилда эса Apple дастурчилар ўзларининг тўлов тизимини жорий этишга урингани сабаб уни ўчириб ташлаган эди. Манбанинг ёзишича, Apple’нинг бу борадаги даромади анча кўп бўлиши мумкин. Sensor Tower таҳлилий компаниясининг ўтган йилги маълумотларига кўра, фойдаланувчилар Apple App Store’даги Fortnite’га қарийб 1,2 миллиард доллар сарфлаган, бу эса Apple’га 354 миллион долларга яқин даромад олиб келган.
Майкл Шмиднинг қўшимча қилишича, Apple сўнгги 11 ой ичида Fortnite’нинг App Store’даги маркетинги учун 1 миллион доллар сарфлаган. Epic Games юристи Лорен Московиц маркетинг ва даромад муносабатларини «фойдали битим» дея таърифлаган.
Sensor Tower маълумотларига кўра, 2020 йилнинг ўзида Купертинодаги компания App Store’даги комиссиялар ортидан 22 миллиард долларга яқин даромад олган. 2020-молиявий йил давомида Apple компаниясининг умумий даромади 275 миллиард доллардан ошган.
Шмидни сўроқ қилган Epic Games Apple ўзининг App Store’си орқали ҳаддан ортиқ кўп даромад кўраётганини исботлаб беришга уринган.
Изоҳ (0)