Ҳиндистоннинг ғарбида содир бўлган циклон натижасида 20 нафардан ортиқ одам қурбон бўлди

Ҳиндистоннинг ғарбида содир бўлган циклон натижасида энг камида 21 киши қурбон бўлди. Бу ҳақда маҳаллий ОАВга таяниб «Интерфакс» хабар берди.

Яна 96 кишининг бедарак йўқолгани айтилмоқда. Кучли шамол дарахтларни қўпориб ташлади. Оқибатда электр энергияси симларига зарар етиб, юз минглаб аҳоли электр энергиясидан узилиб қолди.

Маҳаллй метеорология хизматининг маълумотларига кўра, 17 май куни кечқурун шамол тезлиги соатига 210 километргача чиқди.

Гужарот штатидаги аэропортлар, шу жумладан, Сардар Валлабхай Пател номидаги халқаро аэропорт ёпилди.

Бундан ташқари, ҳодиса Мумбай қирғоқларидаги бортида жами 400 киши бўлган иккита кемага ҳам салбий таъсир кўрсатди. Қутқарувчилар эвакуация ишларини олиб бормоқда, лекин ноқулай об-ҳаво шароити туфайли ҳозирча фақат 177 киши қутқарилди.

Циклон босқичма-босқич заифлашиб бормоқда, лекин яқин кунларда Ҳиндистоннинг аксарият ҳудудларида, айниқса Гужаро ва Махараштра штатларида кучли ёғингарчилик кутилмоқда.

Маълум бўлишича, яқин кунларда ҳукумат бир вақтнинг ўзида табиий офат оқибатларини бартараф этиш ва коронавирус тарқалишига қарши курашни давом эттириши керак.

Сўнгги ҳафталарда Ҳиндистонда коронавирус кенг тарқалаётгани сабабли кескин вазият юзага келди. Шу билан бирга, мамлакатда коронавируснинг ўта хавфли «ҳиндча» тури аниқлангани ҳақида ҳам хабар берилди.

Ҳиндистон коронавирус билан касаллангалар сони бўйича дунёда иккинчи ўринди турибди. Пандемия бошидан буён 24,9 миллион киши коронавирус билан касалланди.

Аввалроқ Ҳиндистоннинг Бихар штатида Ганга дарёсидан COVID-19 туфайли вафот этгани тахмин қилинаётган камида ўттиз кишининг жасади топилгани ҳақида хабар берилди. Ҳиндистон ҳукумати ўликларнинг сувга ноқонуний равишда ташланишининг олдини олиш мақсадида Ганга дарёсига тўрлар ўрнатди.