Шўнғувчилар орасида машҳур бўлган Галапагос оролларидаги Дарвин аркаси қоятоши қулаб тушди. Бу ҳақда Эквадор Атроф-муҳитни муҳофаза қилиш вазирлигига таяниб, BBC хабар берди.
Вазирлик бу ҳодисани эрозия (тошлар ва тупроқларнинг ташқи омил ва сув оқими натижасида емирилиши) билан изоҳлади.
Арка 234 та орол ва алоҳида қоялардан иборат архипелаг таркибига кирувчи одам яшамайдиган Кулпеппер оролидан бир километр узоқликда жойлашган. Оролларнинг тўрттасида 30 мингга яқин одам яшайди. Галапагос ороллари Эквадорга тегишли бўлиб, у Эквадордан 1000 километр масофада жойлашган.
Ороллар ўзининг турли хил флора ва фаунаси билан машҳур бўлиб, уни XIX асрда таниқли инглиз олими Чарльз Дарвин тадқиқ қилган. Галапагос ороллари Дарвиннинг эволюция назариясига туртки берган турларнинг хилма-хиллигини кўриш учун бутун дунёдан келувчи сайёҳлар орасида машҳур ҳисобланади.
Изоҳ (0)