Ҳиндистон чойининг ҳосили 2021 йилда хавф остида қолди. Бу мамлакатдаги иссиқ ҳаво, қурғоқчилик ва коронавирус инфекциясининг кенг тарқалиши билан боғлиқ, деб ёзмоқда Financial Times нашри.
Ҳукумат маълумотларига кўра, чой ишлаб чиқаришда етакчи бўлган Ассам штатидаги энг камида 90 та чой плантацияларида умумий ҳисобда ўсимликларнинг коронавирус билан зарарланиши бўйича 500 та ҳолат рўйхатга олинди.
Плантация эгаларининг сўзларига кўра, вирус тарқалишининг ҳақиқий кўламини билиш учун қўшимча текширувлар ўтказиш талаб этилади. Бундан ташқари, 2021 йилда Ассам ҳамда Ҳиндистоннинг чой етиштириладиган шимоли-шарқий ҳудудлари кучли қурғоқчилик муаммосига дуч келди.
Ишлаб чиқарувчиларнинг таъкидлашича, коронавирус тарқалиши ўз вақтида назоратга олинмаса, қурғоқчилик билан бирга бу муаммо салбий оқибатларга олиб келиши, натижада Ҳиндистон чойининг нархи кўтарилиши мумкин. Чой ишлаб чиқарувчи Van Rees компаниясининг ҳисоб-китобларига кўра, Шимолий Ҳиндистонда чой саноати 2021 йилнинг март ойида 47 миллион килограммни ташкил қилди. Бу кўрсаткич 2020 йилга таққослаганда кўп, лекин 2019 йилга нисбатан сезиларли даражада кам ҳисобланади. Озиқ-овқатлар соҳасига ихтисослашган Mintec таҳлилчи компаниясининг маълумотларига кўра, 2021 йилнинг апрель ойида энг йирик экспорт маркази бўлган Калкутта шаҳрида чойнинг нархи олдинги ойларга таққослаганда 40 фоиздан ортиққа қимматлашди.
Ҳиндистон чой ишлаб чиқариш кўламининг катталиги бўйича Хитойдан кейин иккинчи ўринда туради. 2020 йилда саноат ноқулай об-ҳаво ва пандемия сабабли жиддий зарар кўрди. Mintec таҳлилчиси Иби Идонибоенинг айтишича, Ҳиндистон чойи билан боғлиқ муаммолар кўпроқ чой етказиб бериш имкониятига эга бўлган Шри-Ланка ҳамда Россия каби бошқа чой ишлаб чиқарувчилар учун қўшимча имкониятлар яратиши мумкин.
Бундан олдин Бихар штати аҳолиси ўзлари чўмиладиган ва сув ичадиган дарёдан 100 кишининг жасадини топгани ҳақида маълум бўлди. Уларнинг ўлимига коронавирус инфекцияси сабаб бўлиши мумкинлиги айтилмоқда. Шундан кейин Ҳиндистон ҳукумати ўликларни дарёга ташлашни дарҳол тўхтатишни талаб қилди.
Ҳиндистон ҳукумати ўликларнинг сувга ноқонуний равишда ташланишининг олдини олиш мақсадида Ганга дарёсига тўрлар ўрнатгани ҳақида хабар берилганди.
Маълумот учун, Ҳиндистон коронавирус билан касалланганлар сони бўйича дунёда иккинчи ўринни эгаллаб турибди. Аввалроқ Ҳиндистонда коронавирусдан соғайганларда «қора замбуруғ» тарқалиши қайд этилган эди.
Изоҳ (0)