Туркманистонга 9 май куни Хитойнинг Sinovac компанияси томонидан ишлаб чиқарилган CoronaVac коронавирусга қарши вакцинаси келтирилди. Бу ҳақда Туркманистоннинг Оrient ахборот агентлигига таяниб, «Интерфакс» хабар берди.
«Етказилган вакциналар Туркманистон Соғлиқни сақлаш ва тиббиёт саноати вазирлиги қошидаги Давлат санитария-эпидемиология хизматининг Жамоат саломатлиги ва озиқ-овқат марказида, шунингдек, ЖССТ ва ЮНИСЕФ тавсияларига мувофиқ вакцина сақланиши учун зарур шарт-шароитлар яратилган Ашхобод ва бошқа ҳудудий бўлинмаларнинг санитар-эпидемиологик хизматлар марказида сақланмоқда», — дейилади хабарда.
Дунёда коронавирус пандемиясига қарши кураш шароитида, аввалроқ Туркманистонга Россиянинг «Спутник V» ва «ЭпиВакКорона», шунингдек, Хитойнинг «Биовак» вакциналари етказилган эди. Мамлакатда коронавирус билан касалланиш хавфи юқори бўлганлар гуруҳига кирувчи аҳоли қатламини эмлаш бошланган, деб ёзмоқда агентлик.
Аввал хабар берилганидек, 2021 йилнинг апрель ойида Гурбангули Бердимуҳамедов мамлакатнинг ўткир юқумли касалликка қарши курашиш ва тезкор чоралар кўришга тайёргарлик режасини тасдиқлади. Режа ўта хавфли юқумли касалликлар тарқалишига қарши курашиш бўйича комплекс тадбирлар ташкил этиш, шунингдек, Туркманистоннинг Бирлашган Миллатлар Ташкилоти, унинг ихтисослашган муассасалари ва ЖССТ билан ҳамкорлигини кенгайтириш мақсадида тузилди.
Туркманистоннинг расмий идоралари коронавирус билан касалланиш ҳолатларини тасдиқламаган бўлса-да, мамлакатда тиббий ниқоб тақиш тартиби жорий этилган ва халқаро авиақатновлар тўхтатилган.
ЖССТ мамлакатда пневмония билан касалланиш кўпайганидан хавотирда эканини билдирди ва ҳукуматга коронавирус аллақачон бутун мамлакат бўйлаб тарқалганидагидек зарур чораларни кўришни тавсия қилди.
Аввалроқ онлайн шаклда бўлиб ўтаётган 2021 йилги Жаҳон вакцинаси конгресси мутахассислари коронавирусга қарши энг яхши вакцина сифатида Американинг Moderna компанияси препаратини танлади.
Канада эса Американинг Johnson & Johnson компаниясига тегишли коронавирус вакцинасидан фойдаланишни вақтинча тўхтатди. Қарор Канадага кириб келган препаратнинг дозалари Балтимордаги American Emergent заводида ишлаб чиқарилгани маълум бўлгандан кейин қабул қилинди. Аввалроқ The New York Times газетаси ушбу заводда 15 миллион доза Johnson & Johnson вакциналари яроқсиз ҳолга келиб қолгани ҳақида хабар берган эди.
Изоҳ (0)