Исроил давлат деб эмас, балки террорчилар базаси сифатида қаралиши керак, деб таъкидлади Эроннинг олий диний раҳнамоси Оятуллоҳ Али Хоманаий. Бу ҳақда «Интерфакс» хабар берди.
«Исроил давлат эмас, балки Фаластин халқига ва бошқа мусулмонларга қарши ҳаракат қилаётган террорчилар базаси», — деди Хоманаий ўзининг телемурожаатида.
У 1970 йилларнинг охирида Эронда фаластинликлар билан ҳамкорликда ташкил этилган «Ал-Қудс» бирдамлик куни муносабати билан нутқ сўзлади.
Охирги вақтларда Эрон ва Исроил ўртасидаги қарама-қаршилик яна авж олди. Эрон Оятуллоҳ Хоманаийнинг асосий фалсафий таълимоти асосида Исроил билан тарғибот курашини олиб бормоқда. Шу билан бирга, Эрон Яқин Шарқда, хусусан, Сурияда ўз фаолиятини кучайтирди ҳамда ядро дастури устида жадал ишлай бошлади. Бунга жавобан Исроил ҳам Эронга қарши сиёсатини фаоллаштирмоқда.
11 апрель куни шаҳид Аҳмади Рошан номидаги электр тақсимлаш мажмуасида нохуш ҳодиса содир бўлди. Эрон Атом энергияси ташкилотининг раҳбари Али Акбар Солиҳий тизимдаги носозлик «ядровий терроризм»нинг намойиши эканини айтди, лекин аниқ кучларни саботаж қилишда айблашдан тийилди.
Jerusalem Post газетаси гап, катта эҳтимол билан, ортида Исроилнинг «Моссад» разведкаси турган киберҳужум ҳақида кетаётганини маълум қилди.
Ҳодисадан бир кун олдин Эрон ушбу ядро иншоотида уранни бойитиш жараёнини фаоллаштириш мумкин бўлган илғор центрифугаларни ишга тушириш тўғрисида эълон қилган эди.
Аввалроқ Форс кўрфазида Эрон Ислом инқилоб гвардияси корпусининг (ИИГК) учта қайиғи тезлик билан АҚШнинг иккита ҳарбий кемасига яқинлашгани сабабли кемалардан бири огоҳлантирувчи ўт очгани ҳақида хабар берилди.
АҚШ ИИГК денгиз кучларини денгиздаги кескинликни оширмасликка чақирди.
Изоҳ (0)