Фарғона вилоятида Иккинчи жаҳон уруши қатнашчиларига Президент номидан махсус совға ҳамда 12 миллион сўмдан пул мукофоти топширилди, дея хабар берди «Дарё» мухбири Азизжон Эрматов.
Маълум қилинишича, вилоят ҳокими Хайрулла Бозоров, Шарқий ҳарбий округ қўшинлари қўмондони, Мудофаа ва хавфсизлик тизимлари раҳбарлари, сенаторлар, вилоят секторлари раҳбарлари ва жамоатчилик вакиллари вилоятнинг қатор шаҳар ва туманларида бўлиб, уруш қатнашчилари ҳолидан хабар олган.
Дастлаб Қува туманидаги Қайирма қишлоғида яшовчи Эргаш ота Тошбоев хонадонига борилган. Ҳарбий оркестр ижросидаги тантанали куйлар, меҳмонларнинг очиқ чеҳра билан кириб келиши отахон ва унинг оила аъзоларини севинтирди. Унга 12 миллион сўм пул мукофоти ҳам топширилди.
Таъкидланишича, Президент табриги, пул мукофоти ва эсдалик совғаларини топшириш қувалик 96 ёшли Мўмин ота Тошматовнинг туғилган кунига тўғри келган.
«Биз кўрган кунларни, урушни ҳеч ким кўрмасин. Қанчадан-қанча ватандошларим жангдан қайтмади. Юртимиз ҳамиша тинч, халқимиз омон бўлсин. Бизни эъзозлаётган давлат раҳбарига минг раҳмат», — деди Мўмин ота Тошматов.
Тантанали тадбирлар давомида уларга ҳам вилоят раҳбари томонидан Президент табриги ва байрам совғалари топширилган. Айни кунда вилоятда 45 нафар уруш қатнашчиси истиқомат қилади.
Изоҳ (0)