Туркманистон президентига ички бозор маҳаллий маҳсулотлар билан тўлиқ таъминлангани тўғрисида ҳисобот берилди

Туркманистон савдо ишлари бўйича бош вазири ўринбосари Чори Гилижов 30 апрель куни бўлиб ўтган Вазирлар Маҳкамаси мажлисида президент Гурбангули Бердимуҳамедовга ўз фаолияти тўғрисида ҳисобот бериб, Туркманистон саноат вакиллари ва тадбиркорлари иттифоқи (ТСТИ) аъзолари Туркманистон ички бозорини маҳаллий озиқ-овқат маҳсулотлари билан тўлиқ таъминлаётганини таъкидлади. Бу ҳақда «Хроника Туркменистана» хабар берди.

Хусусан, вазир ўринбосарининг сўзларига кўра, мамлакатда товуқ гўшти ва тухуми, қандолат, гўшт ва колбаса, ичимликлар, ўсимлик мойи, нон, сабзавот, сут ва бошқа маҳсулотлар ишлаб чиқарилади. Гилижов ушбу иш самарадорлигини ошириш учун бир қатор таклифлар билдирди, давлат раҳбари эса унга ва бош вазирнинг иқтисодиёт ва молия масалалари бўйича ўринбосари Гадиргелди Мушшиковга ишлаб чиқаришни кенгайтириш ва озиқ-овқат импортини қисқартириш тўғрисида кўрсатма берди.

Шунингдек, президент Тўқимачилик саноати вазирлигининг фаолияти билан қизиқди ва «замонавий, мавсумга мос пойабзал ва кийим-кечак моделларини ишлаб чиқариш мақсадида мижозлар талабини батафсил ўрганиш» ҳақида топшириқлар берди.

Ҳукумат аъзоларига тадбиркорларни молиявий, моддий ва техник жиҳатдан рағбатлантириш ва мамлакат экспорт салоҳиятини ошириш чораларини ишлаб чиқиш бўйича кўрсатмалар берилди.

Шунингдек, Ашхободнинг давлат дўконларида асосий озиқ-овқат маҳсулотларининг кескин танқислиги ва узун навбатлар кузатилмоқда. Хусусий супермаркетларда озиқ-овқатлар бор, лекин улардаги маҳсулотлар бир неча баробар қиммат, чунки уларнинг нархи давлатникидан 11 баробар юқори бўлган «қора бозор»даги доллар курси асосида белгиланади.

Аввалроқ «президентнинг имижига салбий таъсир қилиши сабабли» Туркманистоннинг маҳсулотларни имтиёзли нархларда сотувчи давлат дўконларида навбат ҳосил қилиш тақиқланди. Ушбу тақиқ Туркманистон президентининг ўғли, бош вазир ўринбосари Сердар Бердимуҳамедовнинг буйруғи билан жорий этилди.

Туркманистон Давлат статистика қўмитаси импорт ва экспорт бўйича расмий статистикани эълон қилмаяпти, лекин Евросиё иқтисодий иттифоқининг статистика маълумотларига кўра, мамлакатда Беларусь, Қозоғистон, Қирғизистон ва Россиядан қилинадиган бир қатор маҳсулотларнинг импорти жуда юқори даражада ҳисобланади.