Бангладешдаги Падма дарёсида тезюрар қайиқ қум ортилган юк кемаси билан тўқнашиб кетиши оқибатида 26 киши ҳалок бўлди, деб ёзмоқда «Korrespondent.net».
Тўқнашувдан сўнг қайиқ бир неча дақиқада чўкиб кетди. Маҳаллий ҳуқуқни муҳофаза қилиш органлари ходимлари қутқарувчиларнинг сувдан 26 нафар қурбонни олиб чиққанини, лекин сув остида яна қурбонлар бўлиши мумкинлигини маълум қилди. Беш киши қутқарилди ва шифохонага етказилди.
Воқеа жойининг яқинида мамлакатдаги энг катта кўприк қурилмоқда, бу эса дарёда ҳаракатланиш учун қийинчиликлар келтириб чиқаради. Шунинг учун кўпчилик хавфсиз тезюрар қайиқлардан фойдаланади. Бундай қайиқларда нариги соҳилга бориш учун, тахминан, 15 дақиқа керак бўлади, анча хавфсизроқ бўлган эшкакли паромларда эса бунинг учун икки соат талаб этилади.
Маълумот учун, апрель ойида Бангладешда бортида 50 киши бўлган қайиқнинг бошқа паромга тўқнашиб кетиши натижасида йўловчиларнинг беш нафари ҳалок бўлган эди.
Аввалроқ Россиянинг Ленинград вилояти, Отрадной шаҳридаги «Пелла» кемасозлик заводида қурилаётган «Скорпион» траулери (балиқ овлаш кемаси) синовлар пайтида ағдарилиб кетгани ҳақида хабар берилди. Ленинград вилояти ҳукуматининг хабар беришича, ҳодиса содир бўлган пайтда траулер бортида 80 киши бўлган, 78 нафар ишчи «зудлик билан эвакуация қилинган». Шунингдек, ҳодиса оқибатида траулернинг бир эркак ва бир аёл ходими ҳалок бўлгани ҳақида хабар қилинди.
Ўрта Ер денгизининг Тунис қирғоқлари яқинида эса ичида ноқонуний кўчаётган муҳожирлар бўлган иккита қайиқ ағдарилиб, чўкиб кетди. Қайиқлар Италиянинг Лампедуза ороли томон кетаётган эди. Ҳалокат оқибатида камида 39 киши ҳалок бўлган. Ҳалок бўлганлар орасида аёллар ва болалар ҳам бор. Уларнинг барчаси Африка мамлакатлари фуқаролари бўлган.
Шунингдек, Россия байроғи остидаги «Арвин» қуруқ юк ташувчи кемаси Қора денгизда, Туркиянинг Бартин вилояти соҳиллари яқинида чўкиб кетгани ҳақида маълумот берилган эди. Бортда жами 13 нафар экипаж аъзоси бўлгани, уларнинг барчаси россиялик экани маълум бўлди. Уларнинг беш нафари қутқарилган. Камида икки киши ҳалок бўлган. Кейинроқ қутқариб олинган Россия фуқароси Николай Кринов фожиа ёмон об-ҳаво шароити туфайли юз берган бўлиши мумкинлигини айтди.
Изоҳ (0)