Меҳнат вазирлиги апрель ойида Қашқадарё ва Андижонда мажбурий меҳнатга йўл қўйган мансабдорлар жавобгарликка тортилганини маълум қилди.
Қайд этилишича, ижтимоий тармоқларда Қашқадарё вилояти Яккабоғ тумани тиббиёт бирлашмасида 17 апрель куни бирлашма ходимлари бинонинг атрофида тозалик ва ободонлаштириш ишларига ишга жалб этилганлиги ҳамда 26—27 апрель кунлари Андижон вилояти Избоскан туманидаги 19-сонли умумтаълим мактаби ўқитувчилари ҳамда техник ходимларининг мактабни капитал таъмирлашга тушган қисмида ишлашга мажбурланганлиги тўғрисидаги хабарлар эълон қилинган.
Мазкур ҳолатлар ҳудудий Давлат меҳнат инспекцияси томонидан ўрганилиб, тегишли мансабдор шахслар Маъмурий жавобгарлик тўғрисидаги кодекснинг 51-моддасига асосан базавий ҳисоблаш миқдорининг 50 баробари (12 миллион 250 минг сўм) миқдорида маъмурий жавобгарликка тортилган.
Аввалроқ Самарқандда ўқувчиларни мажбурий меҳнатга жалб қилган мактаб директори ўринбосари 15,6 миллион сўм жаримага тортилгани ҳақида хабар берилган эди.
Изоҳ (0)