Қирғизистон ва Тожикистон чегарасидаги низо чоғида ҳалок бўлганлар сони 13 кишига етди, деб «РБК» Қирғизистон Соғлиқни сақлаш вазирлигига таяниб, хабар берди.
Аввалроқ ҳалок бўлганлар сони уч киши деб маълум қилинган, улар орасида 13 ёшли қизча борлиги, у касалхонага кетишда вафот этгани айтилган эди.
Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан.
Эртаси куни низога иккала мамлакат ҳарбийлари аралашган, отишма бошланган. Кечга келиб, томонлар ўт очишни тўхтатишга ва қўшинларни олиб чиқиб кетишга келишиб олган.
Кейинроқ Қирғизистон прокуратураси мамлакат Жиноят кодекси 380-моддаси (тинчликка қарши қаратилган жиноят) бўйича судгача бўлган процессни бошлади. Идора Тожикистонни ҳарбий тажовузда, шунингдек, халқаро шартнома ва келишувларни бузишда айблаган. Прокуратура талқинига кўра, тожикистонлик ҳарбий хизматчилар маккорона тарзда мамлакатга бостириб кирган, чегараларга ҳужум қилиб, автоматик қурол, миномёт, зирҳли танк техникаси, жанговар вертолётлар ва бошқа қуроллардан ўт очган.
Хусусан, Тожикистон ҳарбий хизматчилари миномёт ва жанговар вертолётлар ёрдамида тўртта чегара заставасига, чегара постларига ҳамда Қирғизистоннинг Боткен ва Лайлак туманидаги аҳоли пунктларига ҳамла қилган. Оқибатда ҳуқуқ-тартибот органлари ходимлари, ҳарбий хизматчилар ва Қирғизистон тинч аҳолисидан иборат кўпсонли шахслар жабрланган. Бир неча киши ҳалок бўлган, шунингдек, инфратузилма объектлари йўқ қилинган.
«Тожикистон Республикаси ҳарбий хизматчиларининг юқорида қайд этилган хатти-ҳаракатлари Қирғизистон Республикасининг суверенитети ва яхлитлигига нисбатан олдиндан режалаштирилган провокациялари ва тажовузидан гувоҳлик беради», — дея маълум қилишди прокуратурада.
Изоҳ (0)