Кардиолог қориндаги ёғдан халос бўлишнинг иккита оддий усулини маълум қилди

Оддий тери ости ёғидан фарқли равишда висцерал ёғ (у туфайли қорин чиқади) юрак хасталиги, диабетнинг иккинчи тури, қон томирлари ривожланиш хавфини оширади ва қондаги холестерин миқдорининг юқори бўлишига сабаб бўлади, дея огоҳлантиради кардиологлар.

Шифокорларнинг фикрига кўра, висцерал ёғ кўпроқ яллиғланишли оқсилларни ишлаб чиқаради, натижада бундай оқсиллар қон томирлари, қон босими ва бошқа органлар фаолиятига салбий таъсир кўрсатади.

Кардиологлар танадаги қўшимча сантиметр ортиқча килограммга қараганда хавфли эканидан огоҳлантиради. Яъни кишининг чиққан қорнига қараб унинг овқатланиш тартиби ва турмуш тарзи ҳақида бемалол билиш мумкин.

Қориндаги висцерал ёғни йўқотиш учун жисмоний ҳаракатни кўпайтириш лозим. Бунинг учун ҳафтасига 150 дақиқа жисмоний фаолият билан шуғулланишнинг ўзи етади. Буларнинг ичида аэробик машқлар қанча кўп бўлса, шунча самарали бўлади. Шифокорлар тез юриш, югуриш, велосипедда сайр қилиш ёки сузишни тавсия этади. Агар даволовчи шифокор томонидан қарши кўрсатмалар бўлмаса, зиналардан тез-тез чиқиб тушиш ҳам бу борада фойда беради.

Бундан ташқари, ширин ичимликлар ва шакарни рациондан чиқариб ташлаган маъқул. Бунинг ўрнига клетчаткага бой маҳсулотлар: жўхори ва гуруч кепаги, арпа, цитрус мевалар, олма истеъмол қилиш лозим. Мутахассислар фикрича, ҳар ўн грамм эрийдиган клетчатка висцерал ёғни 3,7 фоизга камайтириши мумкин. Шуни ёдда тутиш керакки, «бўш» (қайта ишланган) углеводлар қоринда ёғ пайдо бўлишининг асосий сабабчиларидир.