Ҳар бир аёл ўзини «ёмон хулқ-атвор»да тутадиган фарзанднинг ягона онаси деб ўйламаслиги керак. Болаларга қўйиб берса, кунини фақатгина онасининг бағрида ўтказса. Бу ҳар қандай оила учун таниш, бола ҳамиша онасининг кўтаришини сўрайди ва рад жавобини олса, ўша заҳоти инжиқликлари бошланади.
Шуни англаш керакки, кўпинча болалар кўнгил бўшатиш учун эмас, балки маълум бир сабабга кўра йиғлайди. Сабаблар ҳам жиддий бўлиши мумкин. Онанинг вазифаси эса уни юпатиш ва муаммони бартараф этишдир. Болаларнинг кўз ёшига сабаб бўладиган ҳолатлар бир қанча. Масалан, бола оч қолиши ёки қорни дам бўлиши мумкин. Одатда бундай ҳолат тўрт ойликкача давом этади. Бундан ташқари, иситма, танада оғриқ туфайли ҳам безовталанади. Шунингдек, йиқилиб тушиш натижасида ҳам болада инжиқлик кузатилади. Ва ниҳоят бола шунчаки кийимини ҳўл қилгани учун ҳам йиғлайди. Шуни ҳам инобатга олиш керакки, бола чарчагани учун ҳам йиғлайди. Уларнинг асаб тизими жуда заиф бўлиб, чақалоқлар катталарга қараганда тез толиқади. Ёки бирор нарсадан қўрқиши туфайли ҳам йиғлашга мойил бўлади.
Умуман олганда, жуда кичик чақалоқларда ҳам йиғлаш учун етарли сабаблар бўлиши мумкин. Бундай вақтда болани қўлга ўргатмаслик усулини ўйлаб топишдан кўра аввал сабабларини ўрганиб чиқиш зарур. Бола шунчаки эркалик қиладими ёки бошқа нарса учун йиғлайдими, фарқлаб олиш керак.
Болада чиндан ҳам муаммо бўлса, оғриқ, касаллик, шикастланиш кабилар, уни кўтариб, тинчлантириш зарур. Аммо шунчаки зерикиш ёки эркалик бўлса, болага тарбия бериш вақти келган.
Шифокорларнинг таъкидлашича, болани саккиз ойлигигача кўтармасликка ўргатишнинг имкони йўқ. Бу зарур ҳам эмас. Юриш ва эмаклашни билмайдиган бола учун энг хавфсизи онанинг қучоғи ҳисобланади, албатта.
Шунингдек, чақалоқ йиғлаган вақтда уни кўтармай туриб тинчлантиришга ўргатиш лозим. Масалан, аравачасини силкитиш, ўйинчоғини кўрсатиш каби. Бироз каттароқ болага эса ўйин ўйнашни, расм томоша қилишни ўргатиш мумкин. Мусиқа ёки мультфильм билан чалғитиш ҳам яхши натижа беради. Ўтирган ҳолатда болани қучоқлаш, бошини силаш билан ҳам меҳрни ҳис қилдириш мумкин. Фақатгина уни дарров кўтариб олмаслик керак. Шундагина бола онанинг борлигини, уни ҳеч қачон ташлаб кетмаслигини тушуниб етади
Ушбу тавсияларни амалда қўллашда бироз қатъиятли бўлиш керак. Аста-секин бола ҳам эски одатларини ташлашга ўрганади ва кўтариш учун йиғлаш бефойда эканлигини тушуниб етади. Шунда болажон билан биргаликда бошқа ишни ҳам амалга оширишга имкон топилади.
Изоҳ (0)