Буюк Британияда истиқомат қилувчи аёл қизининг аномал қалин сочларини намойиш этиб, интернет юлдузига айланди, деб хабар беради Daily Mail.
Маълумотларга кўра, Лотти Батчелор жингалак сочлари билан туғилган ва бир йил ичида унинг узунлиги 25 сантиметрга етган. «Туғилганида унинг сочлари жуда ҳам қора ва қалинлигидан ҳайратга тушган эдим. Ойдан ойга ўсиб борган сочлар узунлиги ҳозирда унинг белига тушади», — дейди қизалоқнинг 28 ёшли онаси Эмили Батчелор.
Аёлнинг сўзларига кўра, ҳар куни тонгда у қизининг сочларини тарашга 45 дақиқа сарфлайди. «Қуритишни ўзига ярим соатга яқин вақт кетади, яна 15 дақиқани жингалакларни текислашга сарфлайман. Соч учун мўлжалланган кўплаб воситалардан фойдаланаман, жумладан, кондиционер, антистатик дамлама, осон тараш учун эмульсия, тўлқинсимон толалар учун спрей. Унинг сочларини парваришлашда энг яхши маҳсулотлардан фойдаланамиз», — дейди аёл.
Батчелорнинг қўшимча қилишича, Лотти унинг саккиз маротаба тушиб қолган фарзандидан сўнг туғилган. «Шифокорлар табиий усулда бошқа фарзанд кўра олмаслигимиз мумкинлигини ва сунъий уруғлантириш ҳақида айтганди. Шу сабабли Лоттига мустақил ҳомиладор бўлганим, ҳайратланарли. У бизнинг митти мўъжизамиз», — дейди аёл.
Март ойида аномал даражада қалин сочга эга қизалоқ интернетда машҳурликка эришган. Eyeswideblue ники остидаги фойдаланувчи болани бутилка ёрдамида озиқлантираётгани тасвирланган видеони эълон қилганди. Кадрда қизалоқнинг қалин ва қора сочларини кўриш мумкин.
Мавзуга доир: АҚШда катталиги олмадек келадиган чақалоқ дунёга келди
Изоҳ (0)