Ўзбекистон халқ артисти Мирза Азизов 16 апрель, жума куни 58 ёшида вафот этди.
Мирза Азизов COVID-19 га чалиниб, 25 кун давомида Республика махсус 2-сонли Зангиота шифохонасининг реанимация бўлимида даволанган.
Мирза Азизов май ойининг охирида коронавирус ҳақида спектакль саҳналаштиришни режа қилгани маълум бўлди. Бу ҳақда Муқимий номидаги Ўзбекистон давлат мусиқали театр дирижёри Олимжон Комилжонов YouTube’даги YashinTV каналига берган интервьюсида гапириб берди.
«Бахши» спектаклимизда мотам саҳнаси бор. Бу спектаклни режиссёр Достон Ҳақбердиев билан биргаликда саҳналаштиряпмиз. Худди шу мотам саҳнасини ишлаётган вақтимизда «Мирза Азизов ўтиб қолдилар», деган нохуш хабар келди. Ҳайратда қолдик. Биз «эрта-индин Мирза ака келиб, ҳамма ишимизга бош бўладилар», деб тургандик. Ҳеч кимнинг қўли ишга бормай қолди.Тахминан, 15 март кунларида иккаламиз уларнинг хоналарида суҳбатлашгандик. Ўша суҳбатда «Шоир Ботир Эргашевга коронавирус ҳақида шеърий асар ёзишларини илтимос қилдим. Май ойининг охирларида коронавирус ҳақида спектакль саҳналаштиришни бошлаймиз. Бу орқали вирус қанчалик ёмонлигини, оғирлигини бунга бефарқ қарамаслик кераклигини тушунтирамиз», дедилар. Ёнимда шоир Ботир Эргашев билан гаплашдилар, Ботир Эргашев ҳам ушбу асарни шеърий қилиб ёзаётганини айтганди. Буни қарангки, ўзлари ҳам коронавирусдан ўтиб қолдилар. Ақлимга сиғдира олмаяпман.
Бир шогирдлари билан гаплашиб қолганимизда «Охирги армонларини бажарсак-чи, амалга оширсак-чи?», деб қолдилар. Хотира кечасидек қилиб, шу спектаклни саҳналаштиришни ният қилдик.
Мирза ака жуда олийжаноб, куюнчак инсон эдилар. Умрларини, ёшликларини, кучларини шу театрга бағишладилар.
Олимжон Комилжонов, Муқимий номидаги Ўзбекистон давлат мусиқали театр дирижёри
Изоҳ (0)