Наманган вилоятининг Чуст туманидаги Олмос қишлоғида яшовчи Нуриддин Тўхтамуродовнинг гаражида 6 та ноёб автомобиль сақланмоқда. Бу ҳақда «Дарё» мухбири Азизбек Абдувалиев хабар бермоқда.
65 ёшни қаршилаётган Нуриддин ака қишлоқнинг бадавлат кишиларидан. Тадбиркор, фермер. Тўрт ўғил, бир қизнинг отаси, 18 нафар набиранинг бобоси. Хоббиси — антиквар автомобиллар. Буни бир пайтлар ҳайдовчи бўлгани билан изоҳлайди.
«Ҳайдовчи бўлганмиз-да, шунга қизиқаман. Машиналарни йиғишни бошлаганимга беш-олти йил бўлиб қолди. Олдин биттасини сотиб олдим, кейин яна. Ҳозир жами 6 та бўлди», — дейди у.
Тадбиркор биз билан учрашувга Mercedes-Benz’да келган бўлса ҳам, гаражидаги автомобилларнинг бари ўтган асрнинг 50-60 йилларида Собиқ Иттифоқда ишлаб чиқарилган. Улар қаторида «ЗИМ», «Победа», «Волга», «ГАЗ» ва «Москвич» бор.
«Машиналаримнинг барчаси юради, ҳамма эҳтиёт қисмлари ўзиники. Радиосидан тортиб соатигача ишлайди. Нимадир бузилиб қолса, дарров Россиядан келтираман ёки буюртма бераман. Ўғилларимга ҳам автомобилларга кўз-қулоқ бўлиб туришни тайинлайман», — дейди Нуриддин Тўхтамуродов.
Нуриддин аканинг айтишича, бисотидаги автомобилларнинг ҳар бирини ўз тарихи бор. Масалан, кул ранг «Волга-21» автомобилини қишлоқда жамоа хўжалиги раиси минган, кейинчалик ўғли қорага бўятган. Янги эгасига ўтгач, асл ранги тикланган. Энг қизиғи, Нуриддин ака кейинчалик раиснинг набирасини келин қилди.
Тўхтамуродовнинг гаражидаги автомобиллар чанг босиб ётмайди. Вақти-вақти билан турли тадбир ва юришларга олиб чиқилади, ҳатто фильмларда кўриниш беради. Жумладан, «ЗИМ» автомобилидан «Қўрғошин» фильмида фойдаланилган дейишади.
«Марҳамат, киночилар бемалол машиналаримдан фойдаланишаверсин. Буларни бекор олиб ўтиргандан нима наф? Уларнинг ҳар бири санъат асари. Шундай бўлгандан кейин барча баҳра олиши керак», — дейди Нуриддин ака.
Маълумот учун, қаҳрамонимиз яна «Чайка» автомобилини ҳам харид қилиб, гаражидаги антиквар автомобиллар сонини жами 7 тага етказмоқчи.
Изоҳ (0)