Давлат солиқ қўмитаси раиси Шерзод Кудбиев ижтимоий тармоқларда Тошкент вилоятининг Олмалиқ шаҳрида солиқ хизмати ходимлари сотувчилик орқали кун кўраётган аёлларнинг буюмларини тортиб олгани тасвирланган видеога муносабат билдирди.
Видеода уч нафар солиқ хизмати ходимлари йўл бўйида турли нарсаларни сотиб ўтирган аёлларнинг маҳсулотларини тортиб олиб, машинага ортаётгани тасвирланган.
«Ушбу видеомурожаатни зудлик билан ёзишимга куни кеча ижтимоий тармоқларда Олмалиқ шаҳрида содир бўлган нохуш ҳодиса сабаб бўлди. Бу биз учун жуда уятли, бизнинг шаънимизга, умуман солиқ хизматининг вазифаларига тўғри келмайдиган ҳодиса юз берган.
Давлат солиқ қўмитаси раҳбари ҳозирда Самарқанд вилоятида хизмат сафарида эканлигини, бунга чора кўрилишини ваъда қилган.
«Қайтиб боришим билан Олмалиқда ўша ҳодиса юз берган жойда ўзим бўламан. Лекин унгача кутмасдан, бу ҳодисада ўзини ноўрин тутган, ноўрин хизмат вазифасини бажарган ходимларга нисбатан тегишли жазо чоралари кўрилади.
Ўйлайманки, бу ҳеч ҳам бизга ярашмайди ва солиқ органлари кучишлатар эмас, балки тадбиркорларимизга кўмакчи бўладиган идора. Аммо бундай аянчли ҳолатлар юз беряпти ва биз буни илдизи билан юлиб ташлашимиз керак бўлади. Кўрилган чоралар бўйича қўшимча маълумот берилади», — дейди ДСҚ раҳбари
Шерзод Кудбиев бундай ҳолат юз бергани учун бутун халқдан узр сўраб, бу масала охирига етказилишини таъкидлаган.
Изоҳ (0)