Шакар – бу соғлиқ учун қимматга тушувчи ёқимли ширинлик. Унинг истеъмолини камайтириш ёки бутунлай рациондан чиқариш қандга қарамликдан халос бўлишга ёрдам беради. Шунингдек, ҳаёт учун хавфли касалликларнинг олдини олади.
Кўпчилик шакарни ҳаддан ташқари кўп истеъмол қилиш яхшиликка олиб келмаслигини билади. Аммо ундан тийилиш доим ҳам осон кечмайди. Аввало, ушбу одатнинг зарарлари билан танишиб чиқиш зарур.
Шундай қилиб шакарни кўп истеъмол қилиш семириш ва қанд касалининг асосий сабаби ҳисобланади. Вақт ўтиши билан қонда қанд миқдорининг муттасил кўтарилиши туфайли уйқусизлик, бош оғриғи ва тушкунлик аломатлари пайдо бўлади. Ширинликни ортиқча истеъмол қилиш организмни унга қарам қилиб қўяди.
Немис диетологи Стефан Кабиш рациондан шакарни бутунлай чиқариб ташлашни тавсия этади, чунки организм углеводлардан уни осонликча олиши мумкин. Шунингдек, нафақат шакар, балки таркибида шакар яширин бўлган ширинликлар, тайёр маҳсулотларни ҳам назарда тутади.
Шакардан воз кечганда танада қандай ўзгаришлар юз беради?
Бир кунда – ўзгаришлар деярли сезилмайди. Соғлом организмнинг метаболизми қисқа муддатли шакар етишмаслигини тахмин қилади.
Бир ҳафтада – уч-тўрт кун ичида ижобий натижа. Қонда қанд миқдорининг барқарорлашуви метаболизмни яхшилайди ва энергияни оширади. Шунингдек, уйқу яхшиланади. Организм шакарни талаб этса, мева ёки шакарсиз ширинлик истеъмол қилиш мумкин.
Бир ойда – шакар истеъмол қилмаслик туфайли танада яллиғланиш камаяди, ҳуснбузарлар йўқолади, терининг ҳолати аввалгига қараганда яхшиланади. Қон босими меъёрига тушади. Вазн мушаклар сабабли эмас, танадаги ёғ ҳисобига камаяди. Буларнинг барчаси биргаликда умумий жисмоний ҳолатни яхшилайди.
Бир йилда – онг ниҳоят шакарга қарамликдан халос бўлади. Таркибида шакар бўлган ҳар қандай егуликлар ўз-ўзидан рад этилади. Олиб борилган тадқиқотлар шуни кўрсатдики, шакарни кам истеъмол қиладиган одамларда семириш, қанд касали, юрак етишмовчилиги ва бевақт ўлим хавфи ҳам камаяди.
Изоҳ (0)