Ўзбекистонда ўтган бир сутка ичида яна 40 мингдан ортиқ киши коронавирусга қарши эмланди

Тошкент ва Нукус шаҳарлари ҳамда вилоят марказларида 13 апрель куни коронавирус инфекциясига қарши яна 40 871 киши эмланди, деб хабар бермоқда Соғлиқни сақлаш вазирлиги матбуот хизмати.

Ўзбекистонда шу кунгача коронавирус инфекциясига қарши эмланган фуқаролар сони 256 958 нафарга етди.

13 апрель кунидаги эмлаш кўрсаткичлари бўйича юқори ўринларни

• Фарғона вилояти (7409 нафар),
• Андижон вилояти (5877 нафар),
• Самарқанд вилояти (3826 нафар),
• Бухоро вилояти (3157 нафар),
• Қорақалпоғистон Республикаси (3069 нафар) банд қилган.

Эслатиб ўтамиз, аҳолини коронавирусга қарши эмлаш тадбирлари 1 апрелдан вилоятлар марказлари ва катта шаҳарлардан бошланди. Май ойида эмлаш тадбирлари  туман марказлари ва кичик шаҳарларда амалга оширилади. Июнь ойида эса бошқа аҳоли қатлами эмланади.

Коронавирусга қарши эмланган фуқароларда кузатилган ножўя таъсирларга қарши курашиш мақсадида Тошкентда ташкил этилган 81 та эмлаш пункти 4 та шифохонага бириктирилган.