Меркель коронавирусга қарши курашда «туннель охирида ёруғлик» кўраётганини айтди

Германия канцлери Ангела Меркель мамлакатнинг вакцинация жараёни муваффақиятли кечаётганини ва «туннель охиридаги ёруғлик»ка яқинлашаётганини таъкидлади, деб ёзмоқда «РИА Новости».

«Бунда бизга бир нарса катта ёрдам беряпти. Биз чекловларни қайта киритаётган пайтда вакцинация кампанияси ўз ишини давом эттириб, кундан кунга яхшироқ натижаларга эришяпти ва минглаб аҳоли коронавирусга қарши ишончли ҳимояга эга бўляпти. Вакцинация кампаниясига терапевт-шифокорлар жалб қилинган ва тез орада хусусий клиникаларнинг мутахассислари ҳам қўшилади. Биз туннел охиридаги ёруғликка катта қадамлар билан боряпмиз», — деди Меркель матбуот анжуманида.

Маълумот учун, Германия канцлери Ангела Меркель мамлакатда карантин 18 апрелгача узайтирилганини маълум қилган эди.

Германия Соғлиқни сақлаш вазирлигининг маълумот беришича, 12 апрель ҳолатига кўра, мамлакатнинг 16,3 фоиз аҳолиси (13,5 миллион киши) вакцинанинг биринчи дозасини олиб бўлди, 6,2 фоизи эса (5,1 миллион киши) тўлиқ эмланди.

Германияда 12 апрель куни 400 минг киши вирусга қарши эмланган бўлса, 8 апрель куни мамлакат учун рекорд даражада — 723 мингта вакцинация амалга оширилди. Ҳозирча мамлакатда фойдаланилаётган барча препаратлар иккита дозадан иборат.

Аввалроқ Германия президенти Франк-Валтер Штайнмайер аҳолини Пасха байрами билан табриклаб, чиқиш қилди ва уларни коронавирус пандемияси сабабли қатъий чоралар кўришга чақирди. Штайнмайернинг сўзларига кўра, пандемияни бартараф этиш учун кўп чоралар кўрилди, лекин «синовларда, вакцинацияда, рақамли ечимлар масаласида» хатоларга ҳам йўл қўйилди.

Шунингдек, Германия соғлиқни сақлаш вазирлиги 15 март куни эҳтиёт чораси сифатида AstraZeneca вакцинаси билан одамларни эмлаш ишлари вақтинча тўхтатиб турилганини хабар қилди. «Германия Федератив Республикаси ҳукумати Паул Эрлих номидаги институт тавсияларига амал қилишни лозим деб топди», — дейилган вазирлик баёнотида.

Маълумот учун, Жаҳон соғлиқни сақлаш ташкилоти (ЖССТ) раҳбари Тедрос Гебрейесус дунёда коронавирус билан касалланиш ҳолатларининг кўпайгани кетма-кет еттинчи ҳафта кузатилганини маълум қилди.