Фарғона вилоятида божхона бошқармаси ходимлари томонидан ўтказилган тезкор тадбирда 2 минг 700 литр нефть маҳсулотининг мамлакат ҳудудидан ноқонуний тарзда олиб чиқилишининг олди олинди. Бу ҳақда «Дарё»га вилоят божхона бошқармаси ахборот хизмати хабар берди.
Маълум қилинишича, Фарғона вилояти божхона бошқармаси Контрабандага қарши курашиш ва божхона аудити бўлими ходимлари томонидан Фарғона тумани ҳудудида тезкор тадбир ўтказилган.
Тезкор тадбир давомида фуқаро Л.С. бошқарувидаги «Вито» русумли юк автомашинаси тўхтатилиб, кўздан кечирилганда автомашина юкхонасида тегишли ҳужжатлари бўлмаган, фақат махсус автотранспорт воситаларида ташишга рухсат этилган, 135 дона 20 литрлик елим идишга жойланган умумий қиймати 10 миллион 800 минг сўмлик нефть маҳсулоти борлиги аниқланган.
Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда.
Изоҳ (0)