Хоразмнинг Шовот туманида 19 ёшли келин ўзини осиб ўлдирди. Бу ҳақда Бош прокуратура «Халқ сўзи Online»га маълум қилди.
Унда айтилишича, вилоятнинг Шовот туманида туғилган 19 ёшли Қ.М. 1 апрель куни соат 11:00 да ўз уйидаги молхонанинг ёғоч тўсинига оқ рангли шпагат ип билан ўзини ўзи осиб, ўз жонига қасд қилган. Ўлим сабабларини аниқлаш мақсадида Республика суд-тиббий экспертизаси илмий-амалий марказига суд-тиббий экспертиза тайинланиб, мурда текширувдан ўтказилган. Дастлабки эксперт маълумотига кўра, унинг ўлимига ўзини ўзи осиши натижасидаги асфиксия сабаб бўлган.
Марҳума 2020 йил октябрь ойида 2001 йил августда туғилган М.Я. билан турмуш қуриб, унинг оиласи билан «Катқалъа» маҳалласида истиқомат қилиб келган.
Дастлабки тўпланган ҳужжатларга кўра келин ва унинг оила аъзолари турмуши давомида ҳуқуқни муҳофаза қилувчи органларга ёки маҳалла фуқаролар йиғинига шикоят қилмаган. Унинг турмуш ўртоғи М.Я. ёки оила аъзолари муқаддам судланмаган, нотинч оила ёки бошқа бир ҳолатлар юзасидан рўйхатда турмайди.
«Ҳозирда терговга қадар текширув ҳаракатлари олиб борилаётган бўлиб, якуни юзасидан қонуний қарор қабул қилиниши таъминланади», — дейилади хабарда.
Эслатиб ўтамиз, 2020 йилнинг июль ойида Қашқадарёда 18 ёшли жувон уйидан осилган ҳолда топилган, марҳуманинг онаси қизининг ўлимида куёвини айблаган. Ўша йилнинг октябрь ойида Самарқандда эр 24 ёшли хотинини бўғиб ўлдириб, арқонга осиб қўйгани, ноябрь ойида Бухорода хотинини ўз-ўзини ўлдириш даражасига етказган эр 7 йил-у 6 ойга қамалганди. Шунингдек, Тошкентда хотинини боласининг ахлатини ейишга мажбур қилган эркак ва Хоразмда оилавий жанжал оқибатида хотинини бўғиб ўлдириб қўйган эркак қўлга олингани хабар қилинганди.
Изоҳ (0)