Жамоаларнинг мусобақа жадвалидаги ўрни
«Атлетико» ва «Реал Сосьедад» билан қайд этилган дуранг натижалар «Реал»нинг чемпионликка эришиш имкониятларини пасайтирди ва уларни иккинчи ўриндан пастга тушириб юборди. «Қаймоқранглилар»га ҳозирда ғалаба сув ва ҳаво сингари муҳим, бу уларга «Барселона»ни бир очкога ортда қолдириб, «Атлетико»ка етиб олиш имкониятини тақдим этади. Мағлубият эса катта эҳтимол билан «қироллик клуби»ни чемпионликдан мосуво қилиши мумкин.
«Атлетико»нинг кўплаб муваффақиятсизликлари ва ўзининг 19 ўйиндан иборат бўлган мағлубиятсиз серияси туфайли «Барселона» ҳозирда пешқадамдан атиги бир очкога ортда қолмоқда. «Барса» Ла Лигада кетма-кет олтита ўйиндан бери ғалаба қозонмоқда. «Реал Сосьедад»нинг йирик ҳисобда таслим этилиши ва «Севилья» устидан қозонилган ишончли ғалаба орқали каталонлар мусобақа жадвалидаги ўрнини сезиларли даражада яхшилаб олган.
Асосий воқеликлар
«Реал»«Реал»нинг ҳимоядаги муаммолари ўз чўққисига етди
Ушбу мавсум жамоа сардори Серхио Рамос учун «Реал»даги сўнггиси бўлиши мумкин. Аммо деярли бутун мавсум давомида Серхио жароҳатлар билан овора бўлиб юрибди ва муҳим паллаларда қадрдон жамоасига ёрдам бера олмаяпти. Ҳозирча Рамос Ла Лигада атиги 15 та, Чемпионлар Лигасида эса 4 та ўйин ўтказди. Шу тариқа «Реал» ўз етакчисиз ўйнашни ўрганиши керак бўлди, гарчи бу жамоа учун осон кечмаётган бўлса-да, Зидан шогирдлари ҳозирча буни уддаламоқда деб айтиш мумкин.
Рамос йўқлигида асосий ҳимоячи вазифасини Рафаэл Варан ва Эдер Милитао бажарди. Гарчи баъзида ўта қўпол хатоларга йўл қўйса-да, Варан бунгача ҳам асосий бўлган. Эдер Милитао эса бошқа чора йўқлиги учун майдонга туширилди, бразилиялик ўзи ўйнаган бешта учрашувда иккита сариқ ва битта қизил карточка олганлиги билан ёдда қолди, холос. Энди эса Милитаонинг ёнида Рафаэл Варан ҳам йўқ, франциялик футболчи коронавирусга чалингани туфайли «Ливерпуль»га қарши ўйинни ҳам ўтказиб юборди. Инглиз клубига қарши учрашувда Милитао Начо билан биргаликда ёмон ўйнамади, аммо унутмаслик керак, «Эль-Класико»нинг босимини жиловлашни манаман деган футболчилар ҳам уддалай олмаган.
«Реал» ўз уйида «Барса»га қарши кечган баҳсларда омадсизликка учрайди
Аксарият жамоалар ўз майдонида кечган баҳсларда яхшироқ натижага эришади, бу ҳолатга трибуналарнинг бўш экани ҳам катта таъсир ўтказаётгани йўқ, аммо ҳар соҳада бўлгани каби футболда ҳам истиснолар учраб туради. «Реал» «Барса»га қарши кечган уй учрашувларида одатда муваффақиятсизликка учраб келади. Агар статистика учун сўнгги ўнта ўйин олинса, «Реал» ўз уйида еттита ўйинда мағлубиятга учраган, яна учта баҳс эса дуранг билан якун топган. Меҳмонда эса тўртта ғалаба ва худди шунча дуранг. Шундай экан, «Барса»га қарши ўйинларда «Реал»га «ўз уйингда деворлар ҳам ёрдам беради» ибораси унчалик ҳам мос келмайди.
«Барселона»
Жамоа яна учта ҳимоячи билан ўйнайдими?
«Барселона» охирги ўйинларда учта ҳимоячи билан ҳаракат қилмоқда. Гарчи бу схема ҳозирча нисбатан кучсиз жамоаларга қарши иш бераётган бўлса ҳам, катта ўйинларда панд бермаслигига ҳеч қандай кафолат йўқ. Тўғри, ушбу услуб одатдаги 4-2-3-1 га нисбатан анча тажовузкор ва ёрқинроқдир, аммо «Реал»дек қарши ҳужумларда хавфли бўлган жамоа билан ўйинда бу меҳмонларга қимматга тушиш эҳтимоли анча юқори.
Месси каталонияликларнинг асосий қуроли, аммо бу қурол 2018 йилдан бери иш бермаяпти
«Барса»нинг етакчиси ва унинг асосий фигураси ким эканлиги ҳеч кимга сир эмас. Жорий мавсумда Лионель Месси ва бошқа каталониялик футболчилар ўртасидаги фарқ самарадорликда ҳам, маҳорат бобида ҳам яққол сезилиб турибди. Айнан аргентиналик даҳо аксарият ўйинларда жамоанинг ғалабасини таъминламоқда. «Барселона»нинг сўнгги 16 ўйинида Лео бор-йўғи учта учрашувда майдонни самарали ҳаракатларсиз тарк этди. Бироқ Месси «Реал» билан ўйинларда анчадан буён, аниқроғи Криштиану Роналду Мадридни тарк этганидан кейин (2018 йил) гол урмай қўйган. Агар ёзда Месси жамоани тарк этади деган миш-мишларга ишонилса, бу у учун сўнгги «Эль-Класико» бўлиши мумкин. Табиийки, Месси бу учрашувда гол уришга астойдил ҳаракат қилади. Шундай экан, футбол ихлосмандларини бу учрашувдан жуда кўп нарса кутмоқда.
Жамоаларнинг тахминий таркиблари:
«Реал»: Тибо Куртуа, Лукас Васкес, Эдер Милитао, Начо, Ферлан Менди, Тони Кроос, Каземиро, Лука Модрич, Марко Асенсио, Карим Бензема, Винисиус Жуниор.
«Барселона»: Марк-Андре тер-Штеген, Френки де Йонг, Клеман Лангле, Херард Пике, Хорди Альба, Педри, Серхио Бускетс, Сержиньо Дест, Усмон Дембеле, Антуан Гризманн, Лионель Месси.
Мураббийлар фикри:
Бу ўйин чемпионлик масаласини ҳал қилмайди. «Атлетико»нинг устун томони шундаки, улар биринчи бўлиб ўйнайди. Нима бўлишидан қатъи назар чемпионат ғолиби номи сўнгги турга қадар ҳал бўлмайди.Ла Лига — жуда рақобатбардош ва ажойиб мусобақа. Бу ерда ҳар бир жамоа ғалаба қозониши мумкин, биз бу ким бўлишини охиригача билмаймиз. Олдинда жуда кўп очко ўйналиши керак. Биз ҳимояда сезиларли ўсишга эришдик. Агар ғалаба қозонишни истасак, яхши ўйин намойиш қилишимиз керак. Мавсум ҳали якунланмади ва биз ҳеч нарса ютмадик.
Зинедин Зидан, «Реал» бош мураббийи
«Эль-Класико» бошқа ўйинлардан ажралиб туради. «Барселона»да ҳаммаси жойида, биз яхши формадамиз, соврин учун курашяпмиз.Бу ўйин натижаси чемпионлик пойгасида ҳал қилувчи аҳамият касб этмайди, чунки олдинда кўплаб учрашувлар бор. Исталган жамоага қолган барча ўйинларда ғолиб чиқиш осон бўлмайди. Класикода ғолиб чиққан жамоа кайфиятида жиддий ўсиш бўлади.
Рональд Куман, «Барселона» бош мураббийи
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)