АҚШ президенти Жо Байден ўқотар қуролларнинг савдосини чеклашга қаратилган чоралар ҳақида маълум қилди. Бу ҳақда Meduza хабар берди.
«Қурол ёрдамида зўравонлик жинояти бу мамлакатдаги эпидемия ҳисобланади ва бу халқаро шармандалик», — деб таъкидлади президент.
Байден маъмурияти жорий этган чоралар аввалроқ Оқ уйнинг расмий сайтида эълон қилинди. Улар орасида тўппончадан ўқ отиш аниқлигини оширадиган эҳтиёт қисмлари, шунингдек, тайёр қисмлар тўпламидан йиғилиши мумкин бўлган пистолетларнинг савдосини қатъий назорат остига олишни кўзда тутувчи қоидалар ҳам бор.
Шунингдек, Байден маъмурияти судларга руҳий тушкунликка тушган ҳамда ўзига ва бошқаларга хавф туғдириши мумкин бўлган одамлар учун вақтинча қурол олиб юришни тақиқловчи ваколат беришни режалаштирмоқда.
Адлия вазирлиги ушбу тақиқларнинг жорий қилиниши билан шуғулланади. Бунинг учун Конгресснинг маъқуллаши талаб этилмайди.
CNN’нинг маълум қилишича, бу чеклов Байден маъмуриятининг ўқотар қуроллардан фойдаланишга қарши курашдаги биринчи жиддий қадами. Шунингдек, нашрнинг ёзишича, ҳозирча таклиф қилинаётган янгиликлар чекланган характерга эга ва улар оммавий қотилликларга қарши Байденнинг президентликка номзод сифатида амалга оширишга ваъда берган кенг кўламли чоралари эмас.
Аввалроқ Жо Байден маъмурияти АҚШнинг собиқ президенти Дональд Трамп томонидан киритилган Халқаро жиноий судга (ХЖС) нисбатан санкциялар ва виза чекловларини бекор қилди ва Эронга қарши санкциялар муддатини бир йилга узайтиришга қарор қилди.
Бундан ташқари, АҚШ Хитойдаги Шинжон қурилиш ва ишлаб чиқариш корпуси билан боғлиқ компаниялардан пахта ҳамда текстиль маҳсулотларининг импортига тақиқ қўйди.
Изоҳ (0)