Пандемия сабабли хорижлик дипломатларнинг катта қисми, шу жумладан, халқаро гуманитар ташкилотлар ходимлари Шимолий Кореяни тарк этди. Мамлакатда маҳсулотлар ва дори-дармон воситаларининг кескин танқислиги кузатилмоқда. Бу ҳақда Пхеньяндаги Россия элчихонасига таяниб «Интерфакс» хабар берди.
«Бугун 18 март куни Пхеньяндан чиқиб кетган 38 нафар чет эл фуқаросининг Хитой билан чегарадош Даньдун шаҳрида жойлашган меҳмонхонадаги икки ҳафталик карантин муддати якунланди. Энди улар Пекин ёки Шанхайга қараб йўл олади, у ердан эса ўз мамлакатларига учиб кетади», — дейилади элчихонанинг Facebook’да эълон қилинган хабарида.
Дипломатик ваколатхонанинг таъкидлашича, «энди КХДРни жамоавий тарк этган дипломатик ваколатхона ходимларининг ҳисобини айтиш қийин».
«Бир нарса аниқ, бу охиргиси эмас, хорижликлар мамлакатни тарк этишда давом этади. Ҳозир бу ерда улар деярли қолмади, мамлакатдан чиқиб кетмаганлар бор-йўғи 290 кишидан камроқни ташкил қилади. Шимолий Корея пойтахтини тарк этаётганларни тушуниш мумкин, ҳар ким ҳам куч билан ўрнатилган кенг кўламли умумий чекловларга, зарур маҳсулотлар ва дори-дармон воситаларининг кескин танқислигига, соғлиғи билан боғлиқ муаммоларни ҳал қилиш эркинлигининг етишмаслигига дош беролмайди», — дейилади хабарда.
Россия элчихонасининг маълумотларига кўра, Буюк Британия, Венесуэла, Бразилия, Германия, Италия, Нигерия, Покистон, Польша, Чехия, Швеция, Швейцария, Франция ваколатхоналарининг «эшикларига қулф осилган», халқаро гуманитар ташкилотларнинг барча ходимлари мамлакатни тарк этган.
«Ҳозир бу ерда фақат 9 нафар элчи ва тўрт нафар вақтинчалик ишончли вакил ўз мамлакатлари номидан иш юритмоқда, лекин шу вақтгача фаолият кўрсатаётган элчихоналар ходимлари минимал даражагача қисқартирилди», — дейилади хабарда.
Элчихонанинг қўшимча қилишича, Россиянинг дипломатик ваколатхонаси ўз ишини давом эттирмоқда. «Албатта, бизга ҳам осон эмас, муаммо жуда кўп, бир нечта оила турли сабабларга кўра хизмат сафарларини тугатишга мажбур бўлди. Лекин жамоанинг ишга лаёқатлилиги тўлиғича сақланиб турибди, биз ўзимизга юклатилган барча вазифаларни бажаряпмиз ва бажаришда давом этамиз», — деб таъкидлади дипломатик ваколатхона.
Аввалроқ Россия ва Корея Халқ Демократик Республикаси (КХДР) ўртасидаги чегаралар бир йилдан ортиқ вақтдан буён ёпиқ бўлгани сабабли Россия элчихонаси ходимлари ва уларнинг оила аъзолари ўз ватанига дезина (темир йўлда юрадиган моторли ёки моторсиз арава, вагон)да қайтиб келгани ҳақида хабар берилди.
Шунингдек, Шимолий Корея ҳукумати Вашингтон Пхенянга нисбатан душманлик сиёсатидан воз кечмагунча АҚШнинг янги маъмурияти билан алоқа ўрнатмаслигини айтди. Бу ҳақда КХДР ташқи ишлар вазирининг биринчи ўринбосари Чвэ Сон Хининг Корея Марказий телеграф агентлиги томонидан эълон қилинган баёнотида маълум қилинди.
Шу ўринда, АҚШ президенти Жо Байден КХДР раҳбари Ким Чен Ин билан учрашув ўтказишни режалаштираётгани йўқ. Бу ҳақда Оқ уй вакили Жен Псаки хабар берди.
Бундан ташқари, мамлакат Малайзия билан дипломатик алоқаларни узаётганини маълум қилди. Бунга сабаб қилиб Малайзиянинг ўз ҳудудидаги Шимолий Корея фуқаросини АҚШга топширмоқчилиги кўрсатилмоқда.
Изоҳ (0)