2020 йилнинг ноябрида Санжай тахаллуси билан ижод қилиб келаётган Санжар Жавбердиев Ўзбекистон халқ артисти Шерали Жўраевнинг қўшиқлари матнини ҳуқуқ эгаларининг рухсатисиз ўзгартирган ҳолда ижро этгани сабабли Адлия вазирлиги ҳузуридаги Интеллектуал мулк агентлигига чақиртирилгани тўғрисида хабар берилганди. Агентлик матбуот хизматининг маълум қилишича, хонанда мазкур ҳолат юзасидан маъмурий жавобгарликка тортилган.
Маълум қилинишича, Интеллектуал мулк агентлиги Мулкий ҳуқуқларни жамоавий асосда бошқарувчи ташкилотнинг мурожаати асосида Санжар Жавбердиев томонидан шеър муаллифи Усмон Азимов ҳамда Ўзбекистон халқ артисти Шерали Жўраев ижросидаги «Карвон» номли қўшиғини ва шеърини асар яхлитлигини бузган ҳолда муаллифларнинг розилигисиз ижро этилган ҳолатларни аниқлаган. Шу сабабли Санжайга нисбатан Маъмурий ҳуқуқбузарлик тўғрисидаги баённома расмийлаштирилиб, маъмурий жавобгарлик масаласини кўриб чиқиш учун тегишли судга киритилган.
2021 йил 9 март куни Навоий вилояти Жиноят ишлари бўйича Навоий шаҳар суди томонидан хонанда Санжар Жавбердиев (Санжай)га нисбатан Маъмурий жавобгарлик тўғрисидаги кодекснинг 177-(1)-моддаси (муаллифлик ҳуқуқини ва турдош ҳуқуқларни бузиш) бўйича базавий ҳисоблаш миқдорининг 3 баравари (735 000 сўм) миқдорида жарима жазоси тайинланган.
«Муаллифлик ҳуқуқи ва турдош ҳуқуқлар тўғрисида»ги қонуннинг 62-моддасига асосан муаллифларнинг шахсий номулкий ҳуқуқларини бузиш, ҳуқуқ эгаси ёки мулкий ҳуқуқларни жамоавий асосда бошқарувчи ташкилот билан шартнома тузмасдан асарлар ёки турдош ҳуқуқлар объектини такрорлаш, тарқатиш ёки ундан бошқача тарзда фойдаланиш муаллифлик ҳуқуқи ва турдош ҳуқуқларни бузиш ҳисобланади.
«Қонуннинг тегишли моддаларида муаллиф ҳуқуқлари аниқ келтирилган. Хусусан, ижрочилар ўз ҳуқуқларини ижро этиладиган асарлар муаллифларининг ҳуқуқларига риоя этган ҳолда амалга оширишлари керак», — дейилади хабарда.
Эслатиб ўтамиз, Ўзбекистон қонунчилигида cover ижро тушунчаси киритилмаган. Хорижий давлатларда cover ижро мавжуд. Бу бўйича тарафлар шартнома асосида фаолият юритишади. Яъни ўзганинг асарини cover сифатида ижро қилмоқчи бўлган ижрочи муаллифдан рухсат сўраган ҳолда шартнома тузиши ҳамда шартнома бўйича ҳуқуқ эгасига муаллифлик ҳақини тўлаши лозим.
Изоҳ (0)