Сербияда бепул эмланиш учун келган чет элликлар узун навбатларга тизилди (видео)

Сербия пойтахти Белград шаҳрида дам олиш кунлари минглаб хорижликлар коронавирусга қарши бепул эмланиш учун етиб келди. Бу ҳақда Klix нашрига таяниб, «Korrespondent.net» хабар берди.

Босния, Черногория ва Шимолий Македония аҳолиси вакцинация бош маркази олдида узун навбатга сафланди.

Сербиянинг чегараларига киришда автомобиллардан иборат навбат кузатилди.

Ахборот технологиялари ва электрон ҳукумат масалалари бўйича идора директори Михайл Йовановичнинг сўзларига кўра, Сербияда уч кун ичида 22 мингдан ортиқ чет эллик эмланди.

«Чет элликларни вакцинация қилиш Сербия фуқароларини эмлашга ҳеч қандай халақит бермади, чунки 28 мингдан ортиқ фуқароларимиз шу пайтгача ‘Спутник V’, SinoPharm ва Pfizer вакциналари билан эмланди», — деди Йованович.

Аввалроқ Россия ва Хитойнинг COVID-19’га қарши вакциналар етказиб бериш соҳасидаги ҳаракатлари туфайли Европа янги турдаги жаҳон урушига дуч келди, деб таъкидлади Франция президенти Эмануэл Макрон.

Шунингдек, Париж шаҳрининг чеккасида жойлашган мамлакатдаги энг йирик Stade de France спорт аренасида коронавирусга қарши эмлаш жараёни олиб бориладиган катта кўламли вакцинация маркази ташкил этилиши ҳақида хабар берилди.

Маълумот учун, дунё бўйича аҳолини коронавирусга қарши эмлаш учун кенг кўламдаги ишлар давом этмоқда. Бу жараён 132 та давлатда олиб борилмоқда ва ҳозиргача 400 миллиондан ортиқ вакцина ишлатилди. Охирги кўрсаткичга кўра, бир кун давомида жами 9,64 миллион доза вакцина қилинган.