Мумбайдаги Dreams Mall савдо марказида жойлашган коронавирус беморлари даволанаётган Sunrise Hospital шифохонасида содир бўлган ёнғин оқибатида 10 киши ҳалок бўлди. Бу ҳақда Times of India нашрига таяниб «Интерфакс» хабар берди.
Ёнғин 25 март куни кечқурун бошланган. Шифохонадан 76 киши эвакуация қилинди, уларнинг 7 нафари ўпкани сунъий шамоллатиш мосламасига уланган эди. Кейин тонгга яқин яна бир ёнғин содир бўлди.
Шифохона бинонинг учинчи қаватида жойлашган. Шифохона маъмуриятининг айтишича, ёнғин дўконлар жойлашган биринчи қаватда бошланган, лекин тутун палаталаргача етиб келган. Шунингдек, аниқланган қурбонлар орасида ёнғин бошлангунича коронавирусдан вафот этган беморлар ҳам бор эди.
Мумбай мери Кишори Педнекар воқеа юзасидан батафсил суриштрув ишлари олиб борилишига ваъда берди. Шунингдек, у юқумли касалликлар шифохонасининг савдо марказида жойлашганини биринчи марта кўраётганини таъкидлади.
Times of India нашрининг ёзишича, 2020 йилнинг октябрь ойида ҳам Мумбайнинг Мулунд шаҳарчасидаги коронавирусга чалинган беморлар даволанаётган яна бир шифохонада ёнғин содир бўлган. Ўшанда икки нафар бемор қутқарув жараёнларида ёки қутқариб бўлингач вафот этган эди. Суриштирув жараёнида аниқланишича, шифохона чироқ ўчиб қолиш эҳтимоли борлиги учун эски электрогенератордан фойдаланилган, қурилма етти соатлик иш натижасида қизиб кетган ва ёнғин чиққан.
Аввалроқ Бангладешнинг жанубидаги Кокс-Базар шаҳрида жойлашган Балухали рохинжа қочқинлари лагерида катта ёнғин чиқиб, бир неча киши ҳалок бўлди. Таъкидланишича, келиб чиқиши номаълум бўлган ёнғин минглаб уйларни йўқ қилган.
Изоҳ (0)