Фото: АҚШнинг Алабама штатидаги торнадо оқибатлари

АҚШнинг Алабама штатида содир бўлган торнадо оқибатида камида беш киши ҳалок бўлди. Бу ҳақда ABC телеканалига таяниб «Korrespondent.net» хабар берди.

АҚШнинг Миллий метеоролия хизмати маълумотларига кўра, штатда еттита торнадо қайд қилинди. Торнадо Пелхэм шаҳридаги 30 тадан 50 тагача уйлар ва иншоотларга зарар етказди. Оқибатда жануби-шарқда 55 мингга яқин аҳоли, шу жумладан, Алабамада 36 мингдан ортиқ киши электр энергиясиз қолди.

Метеорологлар Бирмингем шаҳридан жанубда ва шарқда жойлашган туманларда, шунингдек, Шелби ва Жефферсон округларида фавқулодда ҳолат эълон қилди.

Торнадо хавфи штатнинг шимолий қисмида, шу жумладан, Бирмингем, Таскалуса ва Хантсвиллда сақланиб қолмоқда.

Аввалроқ АҚШ Миллий метеоролия хизматининг профиль бўлими Алабама, Миссисипи ва Теннесси штатларида торнадо хавфидан огоҳлантирган эди. Алабамада табиий офат Элисвилл яқинидаги ҳудуддан бошланди.

Теннесси ва Кентукки штатларида шамолнинг тезлиги соатига 80 милга етиши мумкин, жуда кучли дўл ёғиш эҳтимоли бор. Ярим тунда Атлантада, шунингдек, Ўрта Атлантика ва Огайо водийси ҳудудларида талафотли шамол бўронлари бўлади. Бундан ташқари, аҳоли сув тошқини эҳтимоли ҳақида огоҳлантирилди.

Январь ойининг охирида Алабама штатининг унчалик катта бўлмаган шаҳрида торнадо содир бўлди. Кучли бўрон Фултондейл шаҳридаги (Жефферсон округи, Алабама штати) меҳмонхонани бутунлай вайрон қилди ва хусусий уйларга зарар етди, дарахтлар қулаб тушди.