Интернетда энг секин дрег-пойгалардан бири тасвирланган видео пайдо бўлди: армия учун мўлжалланган саккиз ғилдиракли Oshkosh HEMTT ва учта автомобиль ортилган тиркама уланган Ford F-450 машинаси бир-бири билан беллашди. Беллашув якунида Америка пикапи ғолиб бўлган. Бундан ташқари, пойгада аэродром ўт ўчириш машинаси ҳам иштирок этган бўлиб, у инсон билан куч синашган, деб хабар беради Motor.
Тўлиқ узатмали Ford F-450 пикапига 475 от кучига эга 6,7 литрли V8 дизель двигатели ўрнатилган. Агрегат олти поғонали автомат узатмалар қутиси ёрдамида бошқарилади. Пикап оғирлиги 12,7 минг килограммни ташкил этади. Пойга учун Ford’га махсус тиркама уланган бўлиб, унинг устида эски BMW седани ва иккита ҳарбий йўлтанламас ортилган. Шу сабабли пойга иштирокчисининг аниқ массаси номаълум.
Пикапга армия учун мўлжалланган 17,7 минг килограммли Oshkosh HEMTT юк машинаси рақобатчилик қилган. АҚШ ҳарбийлари учун мўлжалланган саккиз ғилдиракли машина 360 от кучига эга 12,1 литрли мотор ёрдамида ҳаракатга келади. Агрегат тўрт поғонали автомат трансмиссия ёрдамида бошқарилади. Юк машинасининг максимал тезлиги соатига 100 километр.
Узоқ кутишга тўғри келмаслиги учун дрег-пойга 150 метр масофага ташкил этган. Биринчи уринишда автовоз уланган Ford F-450 катта фарқ билан финишга биринчи бўлиб келган. Иккинчи уринишда ҳам армия машинаси муваффақиятсизликка учраган — пикап яна биринчи.
Бундан ташқари, ишқибозлар Оshkosh HЕМТТ ва аэродром учун мўлжалланган олти ғилдиракли ўт ўчириш машинаси ўртасида ҳам пойга уюштирган. Ушбу беллашувда ҳарбий юк машинаси ғолиб бўлган. Пойгаларнинг бирида оғир ўт ўчириш машинаси билан суратга олиш гуруҳи аъзоларидан бири беллашган. Эркак стартда югуриб, анча одимлаб кетган, бироқ финиш чизиғига барибир аэродром техникаси биринчи бўлиб етиб келган.
Аввалроқ YouTube’даги Carwow канали блогерлари янги Land Rover Defender, Mercedes-Benz G-Class ва Jeep Wrangler Rubicon моделларининг юк тортиш қобилиятини синаб кўргани тўғрисида хабар берилганди.
Изоҳ (0)