Хоразм вилояти Урганч шаҳар ИИО ФМБ ижтимоий тармоқларда яримяланғоч ҳолда сумалак пишираётган аёл-қизлар тасвирланган видеога оид ҳолатни ўрганишни бошлагани тўғрисида хабар берилганди. Ижтимоий тармоқларда ушбу аёлларнинг кечирим сўрагани тасвирланган видео пайдо бўлди.
21 март куни ижтимоий тармоқларда Урганч шаҳридаги «Саҳара» кафеси олдида шу кафеда ишловчи бир гуруҳ хотин-қизлар яримяланғоч кийинган ҳолда сумалак пишираётганликлари акс этган видео тарқалганди. Ижтимоий тармоқ фойдаланувчилари томонидан кескин танқид қилинган ушбу видеолавҳада акс этган ҳолат юзасидан ҳозирги кунда Урганч шаҳар ИИО ФМБ томонидан суриштирув ишлари олиб борилмоқда.
Вилоят ИИБ ахборот хизмати раҳбари Зокир Исмоиловнинг сўзларига кўра, видеолавҳада акс этган барча иштирокчиларнинг шахсига аниқлик киритилган.
Кескин танқидлардан кейин ижтимоий тармоқларда ушбу аёл-қизларнинг қилган ишларидан кечирим сўраб чиққани тасвирланган видео пайдо бўлди. «Узр, билмай қилибмиз, кечирасиз», дейилади қисқа видеода.
Изоҳ (0)