Ўзбекистон ва Қирғизистон ўртасида давлат чегарасини делимитация ва демаркация қилиш бўйича Қирғизистон ҳукумати делегацияси раҳбари — Қирғизистон Миллий хавфсизлик давлат қўмитаси раиси генерал-лейтенант Қамчибек Ташиев 22 март куни Тошкентга учиб келди, деб хабар беради қўшни мамлакат ҳукумати матбуот хизмати.
Ташриф давомида икки мамлакат ҳукумати делегацияларининг Қирғизистон—Ўзбекистон давлат чегарасини делимитация ва демаркация қилиш бўйича қўшма йиғилиши ҳам бўлиб ўтади.
Ҳукуматлараро дегалация йиғилиш 24—25 март кунлари Тошкент шаҳрида бўлиб ўтади. Ўзбекистон томонидан делегацияга бош вазир Абдулла Арипов бошчилик қилади.
Таъкидланишича, учрашув давомида ҳукумат комиссиялари ўзбек—қирғиз давлат чегарасининг қолган участкаларини делимитация қилишни муҳокама қилади.
Эслатиб ўтамиз, 11 март куни Шавкат Мирзиёев Қирғизистон президенти Садир Жапаровни қабул қилганди. Учрашувда 2017 йил 5 сентябрда имзоланган Ўзбекистон–Қирғизистон давлат чегараси тўғрисида шартноманинг тарихий аҳамияти қайд этилиб, мазкур чегаранинг қолган қисмларини ҳам делимитация қилиш мақсадида Ҳукуматлараро комиссияга музокараларни фаоллаштириш бўйича кўрсатма берилган.
Изоҳ (0)