«Тўйларни ўтказиш бўйича низом маҳаллаларда ишлаётгани йўқ». Бахтиёр Сайфуллаев тўйларни ўтказиш тартиби юзасидан Сенат ўрганиш олиб боришини маълум қилди

Олий Мажлис Сенати аҳоли ҳамда мутасадди ташкилотлар томонидан тўй ва маросимларни ўтказиш тартибига қай даражада амал қилинаётгани бўйича ўрганиш олиб боради. Бу ҳақда Сенатнинг ёшлар, маданият ва спорт масалалари қўмитаси раиси Бахтиёр Сайфуллаев «Дарё» мухбири Мусулмонбек Иброҳимовга берган қисқача интервьюсида айтиб ўтди.

Эслатиб ўтамиз, 2019 йилнинг сентябрида Олий Мажлис Сенати кенгаши ҳамда Олий Мажлис Қонунчилик палатаси кенгашининг қўшма мажлисида тўй-ҳашамлар, оилавий тантаналар, маърака ва маросимлар борасида сўз юритилганди. Октябрда эса Олий Мажлис Сенати тўйлар, оилавий тантаналар, маърака ва маросимлар ўтказилишини тартибга солиш тўғрисидаги низомни эълон қилганди. 2020 йил 1 январдан бошлаб, тўй-ҳашамларни тартибга солиш ҳақидаги Сенат ва Қонунчилик палатасининг қўшма қарори (юридик жиҳатдан кучи қонунга тенг) кучга кирган. Маъмурий жавобгарлик тўғрисидаги кодексга тўйларни ўтказиш тартибини бузганлик учун жавобгарлик  белгиланган эди.

Ўзбекистонда коронавирус эпидемияси тарқалишининг олдини олиш мақсадида 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган. Ушбу тақиқдан сўнг тўй маросимларини ўтказишга уринганларга нисбатан ҳатто жиноят иши ҳам қўзғатилган. Мамлакатда эпидемиологик вазият барқарорлашиб, нисбатан назорат остига олингач Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилганди. Мамлакатда коронавирус билан боғлиқ вазият кескинлашгани сабабли 10 июлдан бошлаб мамлакатда тўйларни ўтказиш яна тақиқланганди. Шундан сўнг 15 августдан 30 кишилик тўйларни ўтказишга яна рухсат берилган.

Сенаторнинг маълум қилишича, Республика махсус комиссияси томонидан тўйларни 30 кишидан ошмаган ҳолда ўтказишни белгилаб берган бўлса-да, охирги пайтларда бунга амал қилинмаяпти.

«Аввал бошида тўй эгалари бир кун куёв болани дўстлари, бир кун келинни ўртоқлари, бир кун қудаларга, бир кун маҳаллага ва қавм-қариндошларга ош бериб, 30 кишидан тўйларни ўтказишди. Ҳозирги кунда тўйларда меҳмонлар сони яна ошиб боряпти. Айниқса, бу каби ҳолатлар кўпроқ вилоятларда кузатилмоқда. Шу боис Республика махсус комиссиясини йиғиб, ушбу масалаларни кўриб чиқмоқчимиз. Асосий эътиборни маҳалла фуқаролар йиғинларига қаратмоқчимиз. Жойларда тўйлар ва маросимларни ўтказишда маҳаллалар сал четда қолаётгандек, назаримда», – деди Бахтиёр Сайфуллаев.

Қўмита раисининг алоҳида таъкидлашича, тўйларни ўтказиш бўйича низом маҳаллаларда «ишлаётгани йўқ». Яна бир жиҳати, ушбу низомни бузган фуқароларга жуда кам миқдорда жарима қўлланилади. «Шу даражадаки, пулни тўлайди-да, хоҳлаганича тўйни ўтказаверади».

Маълум қилинишича, тўйлар, оилавий тантаналар, маърака ва маросимлар ўтказилишини тартибга солиш тўғрисидаги низом талабларини бажаришда камчиликларга йўқ қўяётган вазирлик ва мутасадди ташкилотлар устидан Вазирлар Маҳкамасига парламент сўрови юборилади.

«Сенат қўмитаси томонидан март ойи охирида тўй ва маросимларни ўтказиш тартибига қай даражада амал қилинаётгани юзасидан йиғилиш ўтказиш режалаштирилган. Низом талабларини қай даражада бажарилаётгани аниқлаш мақсадида битта вилоят ва битта туман кесимида ўрганиш олиб борамиз. Натижалари бўйича Республика комиссиясига ўз хулосаларимизни тақдим этиб, уларга ўз саволларимизни берамиз», – дея қўшимча қилди қўмита раиси.

Президент Шавкат Мирзиёев томонидан 2020 йил апрель ойида коронавирус тарқалиши ва унинг оқибатларига қарши кураш масалалари бўйича ўтказилган видеоселекторда карантин вақтида тўй-маросим ўтказганларни «масъулиятсизлар» деб атаган эди. Ўзбекистон Президенти 2020 йил август ойида ўтказган видеоселектор йиғилишида аҳолини тўй ўтказишда белгиланган талабларга риоя этишга чақириб, 30 кишилик тўйларга рухсат берилганида, кўп жойларда бу чекловга амал қилинмаганини айтиб ўтганди.