Bonhams аукциони орқали ҳарбийлар учун мўлжалланган 1943 йилда ишлаб чиқарилган GMC DUKW амфибияси сотувга қўйилди. Иккинчи жаҳон уруши даврида Британия қуролли кучлари учун хизмат қилган машинадан қўшинлар ва юкларни ташишда фойдаланилган. Омон қолган нусха 18-20 минг фунт стерлингга баҳоланмоқда, деб хабар беради Motor.
GMC DUKW’ни яратиш устида General Motors компанияси муҳандислари Sparkman & Stephens фирмаси мутахассислари билан ишлаган. Конструкторлар бу турдаги амфибиядан жами 353 нусха яратган бўлиб, улардан Британия қуролли кучлари фойдаланган. Сотувга қўйилган машина 1943 йилда Қироллик транспорт корпусининг 19-десант эскадрилясига юборилган.
Олти ғилдиракли машина 2300 килограмм юк ёки 24 нафар ҳарбий хизматчини ер ва сувда ташишга мўлжалланган. Амфибия 91 от кучига эга 4,4 литрли GMC Model 270 двигатели ёрдамида ҳаракатга келган. DUKW қуруқликда соатига 80 километр, сувда эса олти узел (11 километр) тезликда ҳаракатлана олган.
Мазкур нусха жанговар ҳаракатларда бевосита иштирок этган ёки этмагани номаълум. Урушдан сўнг омон қолган амфибия 1970 йилларда Буюк Британиядаги Қироллик транспорт корпуси музейига топширилган.
Ҳарбий амфибия сотилишидан олдин унинг барча ёқилғиси тўкиб олинган. Бундан ташқари, сотувчининг маълум қилишича, потенциал харидор машинани вақти-вақти билан реставрация қилиб туриши керак бўлади.
Аввалроқ Россияда Иккинчи жаҳон урушига оид немис йўлтанламас-амфибияси 160 минг долларга сотилаётгани тўғрисида хабар берилганди.
Изоҳ (0)