8 февраль куни Ўзбекистон Президенти Тошкент вилоятларидаги инвестиция лойиҳалари билан танишгани тўғрисида хабар берилганди. Унда давлат раҳбарига IKEA компаниясининг инновацион мебель ишлаб чиқариш фабрикаси қурилиши лойиҳаси ҳам тақдим этилган. «Gazeta.uz»нинг IKEA’ни ОАВ билан ишлаш бўлимига таяниб ёзишича, компания Ўзбекистонда фабрика очишни режалаштираётганига оид хабарларни рад этган.
«IKEA Supply’нинг бошқа компаниялари сингари, IKEA Industry Ўзбекистонда фабрика очишни режалаштирмаяпти. Янги бозорларга келсак, IKEA 2025 йилга қадар дунё бўйлаб кўпроқ харидорларни жалб қилишни давом эттириш мақсадида 12 та янги бозорга киришни режалаштирмоқда. Мазкур фаолиятни кенгайтириш режасида Ўзбекистон иштирок этмайди», — дейилади компания хабарида.
Президентга тақдим этилган лойиҳанинг умумий қиймати 52 миллион АҚШ доллари миқдорида баҳоланган эди. Шундан 10 миллион доллар маблағ лойиҳа ташаббускорининг ўз ҳисобидан, қолган 42 миллион доллар эса хорижий инвестиция эвазига молиялаштирилиши айтилган эди.
Маълумот учун, IKEA — трансмиллий корпорация бўлиб, 1943 йилда Швецияда 17 ёшли Ингвар Кампрад томонидан тузилган. Компания тез йиғиладиган мебель, ошхона техникаси ва уй жиҳозларини ишлаб чиқаради. Бош офиси Нидерландияда жойлашган. IKEA 2008 йилдан бери дунёдаги энг йирик мебель сотувчиси ҳисобланади. IKEAнинг кўплаб дўконлари INGКА холдинг компаниясига тегишли, компания эса Stichting INGКА — дунёнинг энг бой 40 та фондларидан бири томонидан бошқарилади. Август ойининг охирида Ingka Group 50 дан ортиқ мамлакатда 445 та чакана савдо дўконига эга эди.
Изоҳ (0)