Чехиядаги иккита ҳайвонот боғи ташриф буюрувчилар йўқлигида ўз шимпанзелари зерикмаслиги учун уларга видеоалоқа ўрнатиб берди, деб ёзади Esquire.
Коронавирус пандемияси сабаб Чехиядаги кўнгилочар масканлар декабрь ойидан буён меҳмонлар учун ёпиқ. Ҳайвонлар ўзини ёлғиз ҳис қилмаслиги учун бир-биридан 150 километр узоқликда жойлашган иккита ҳайвонот боғи онлайн учрашув ташкил этишга қарор қилган.
Шимпанзелар бир-бирини эшитмайди ва фақат катта экрандаги трансляцияни томоша қилади. аввалига маймунлар бироз қўрқиб, экранга таҳдид қилиб яқинлашган, аммо ҳозирда улар тасвирга қизиқиш билдирмоқда.
«Улар ‘Мен кинодаман’ ёки ‘Мен телевизор кўряпман’ режимига ўтди. Агарда улар қандайдир кескин вазиятга дуч келса, сакрай бошлайди, худди биз тўғридан-тўғри эфирда спорт мусобақаларини кузатганимиздаги каби», — дейди ҳайвонот боғларидан бирининг ходими.
Унинг сўзларига кўра, шимпанзе экранда содир бўлаётган воқеани томоша қилиш вақтида ҳатто одамларга ўхшаб бирор нима еб ўтиришни ҳам ўрганиб олган — одатда, улар ёнғоқ истеъмол қилади.
Бу каби видеоконференция иккита ҳайвонот боғи ўртасида эрталабдан кечга қадар давом этади. Агарда ходимлар бу каби амалиёт шимпанзеларга ростан ҳам ёрдам беради деб ҳисобласа, кейинчалик ҳам давом эттирилиши мумкин.
Мавзуга доир: Видео: Волердаги ойна ва полни ўзи тозалаётган шимпанзе
Изоҳ (0)