Шуҳрат Абдураҳмонов: «Қирғизистон ҳудудида тадбиркорларимиз томонидан ишлаб чиқариш биноларини қуриш, ишчи ўринлари яратиш масалаларини ҳам муҳокама қилдик»

Андижон вилояти 2020 йилда Қирғизистон билан 270 миллион долларлик маҳсулот айрибошлаган. Бу ҳақда Андижон вилояти ҳокими Шуҳрат Абдураҳмонов Қирғизистон президенти Садир Жапаров ташрифи муносабати билан 12 март куни Тошкент шаҳридаги технопаркда ташкил этилган кўргазмада журналистларга берган интервьюсида таъкидлаб ўтди, дея хабар қилмоқда «Дарё» мухбири.

«Ташрифнинг биринчи куни вилоятларимиз ўртасидаги муаммоли масалаларнинг ҳаммасини муҳокама қилиб, келишувга эришдик. Бугунги иккинчи кунда эса асосий масала — савдо-иқтисодий алоқаларимизни ривожлантиришга қаттиқроқ урғу беряпмиз. Нафақат бизнинг маҳсулотларни Қирғизистонга олиб чиқиб сотиш, балки қўшни мамлакат ҳудудида тадбиркорларимиз томонидан ишлаб чиқариш (объект)ларни қуриш, ишчи ўринлари яратиш масалаларини ҳам муҳокама қилдик.

Умуман айтганда, андижонлик тадбиркорлар Қирғизистонга инвестиция олиб кириши, қирғизистонлик ишбилармонлар эса Ўзбекистонга инвестиция олиб кириш масаласи бўйича жуда катта савдо шартномалари туздик. Хусусан, 60 миллион доллардан ортиқ экспорт шартномаси, 10 миллион доллардан зиёд инвестиция киритиш бўйича шартномалар имзоланди. Бу яна давом этяпти.

Мазкур ташриф ва учрашув икки мамлакат ўртасидаги савдо-иқтисодий алоқаларни, иккита халқнинг фаровонлигини таъминлашга катта хизмат қилади, деб ўйлайман», — деди вилоят раҳбари.

Унинг айтишича, маданият ва санъат соҳаларидаги ҳамкорликни ҳам ривожлантириш режалаштирилган.

«Жалолобод ва Ўш вилоятларининг кўп аҳолиси ўзбек миллатига мансуб фуқаролар ҳисобланади. Шу боис ҳам нафақат савдо-иқтисодий, балки маданият, санъат, спорт йўналишларида ҳам борди-келди қилиш, қолаверса, ‘Андижон кунлари Ўш—Жалолободда’, ‘Ўш—Жалолобод кунлари Андижонда’ каби янги тизимларни ҳам келишиб, ‘йўл харитаси’га киритдик. Ўйлайманки, буларнинг ижросини таъминласак, маданиятимизни ҳам, тарихимизни ҳам бирлигини исботи бўлади», — деди у.

Абдураҳмоновнинг қўшимча қилишича, Андижон вилояти Қирғизистонга 2020 йилда 2019 йилга нисбатан 1,2 баробар кўп маҳсулот айрибошлаган.

«Андижон вилоятининг ўзи 2020 йилда Қирғизистон билан 270 миллион долларлик маҳсулот айрибошлаган. Пандемияга қарамай, бу кўрсаткич 2019 йилга нисбатан 1,2 баробар кўп. Давлатимиз раҳбари ушбу рақамни икки баробар ошириш зарурлигини таъкидлади. Бунинг учун барча имкониятларимиз бор», — деди Шуҳрат Абдураҳмонов.