БМТ бош котиб Антониу Гутерриш шошилинч чоралар кўрилмаса, дунё бўйлаб миллионлаб одам очарчилик ёқасига бориб қолиши мумкинлиги ҳақида огоҳлантирди. Гутерриш бу фикрни ташкилотнинг Хавфсизлик кенгаши йиғилишида билдирди. Бу ҳақда «РБК» хабар берди.
«Агар шошилинч чоралар кўрилмаса, миллионлаб одамлар очарчилик ва ўлим ёқасида қолади», — деб таъкидлади бош котиб.
БМТнинг умумий маълумотларига кўра, 2020 йилда жами 88 миллион одам очарчиликдан азият чекди, бу 2019 йилги кўрсаткичдан 20 фоизга кўпроқ.
«2021 йилги прогнозлар ушбу қўрқинчли тенденция давом этишини кўрсатмоқда», — деди Гутерриш ва иқлим ўзгаришлари ва коронавирус пандемияси вазиятни янада кучайтираётганини қўшимча қилди.
2020 йилнинг апрель ойида БМТнинг Бутунжаҳон озиқ-овқат дастури (БОД) ижрочи директори Дэвид Бизли агар озиқ-овқат хавфсизлиги таъминланмаса, коронавирус пандемияси сабабли инсоният «Инжил миқёсидаги» очликка дуч келиши мумкинлигини таъкидлаган эди.
БОД 2020 йилнинг охиригача дунё бўйича 265 миллион киши озиқ-овқат етишмаслиги муаммосига дуч келиши мумкинлигини прогноз қилган эди. Гап биринчи навбатда очарчиликдан азият чекаётганларнинг ярми яшайдиган Африка мамлакатлари ҳақида кетмоқда. Яқин Шарқ ва Осиёда очарчиликка дуч келган яна 43 миллион одам яшайди. Кариб денгизи ва Лотин Америкасида эса бу кўрсаткич 18,5 миллион кишини ташкил қилади.
Аввалроқ БМТнинг Атроф-муҳитни муҳофаза қилиш дастури (UNEP) тақдим этган янги ҳисоботда дунёдаги озиқ-овқат маҳсулотларининг учдан бир қисми чиқитга чиқиб кетиши маълум қилинган эди.
Изоҳ (0)