UzAuto Motors Италия ва Жанубий Кореяда ишлаб чиқарилган носоз эҳтиёт қисмлар сабаб 13 мингта машинага бепул хизмат кўрсатгани маълум бўлди

UzAuto Motors компаниясида 2—3 март кунлари бўлиб ўтган пресс турда техник носозлик туфайли сотилган автомобилларнинг чақириб олинган ҳолатлари ҳақида маълумот берилди.

«Дарё» мухбири Мусулмонбек Иброҳимовнинг компания бош директори Рустам Ражабов берган маълумотларга асосланиб хабар беришича, 2020 йилда Россияда сотилган UzAuto Motors’нинг 5 мингта автомобили техник носозлик туфайли чақириб олинган.

«Россияда ЭРА-ГЛОНАСС – бахтсиз ҳодисалар содир бўлганда Россия фавқулодда вазиятларни бартараф этиш тизими мавжуд. Бу каби тизим Ўзбекистонда йўқ. Автомобиль ичига ўрнатиладиган микросхема йўл транспорт ҳодисаси юз берганда ўша тизимга спутник орқали сигнал беради. Россия қонунчилигига кўра, ушбу микросхемани автомашинага ишлаб чиқарувчи томонидан ўрнатиш талаби мавжуд. Биз ишлаб чиқарган автомобилларнинг ЭРА-ГЛОНАСС микросхема ишламай қолган. Ўрнатилган микросхема Италиядаги компания томонидан ишлаб чиқарилган эди. Муаммони бартаф этиш учун 5 мингта машинани чақиртириб, микросхемани алмаштириб берганмиз. Харажатларимизни айбдор – етказиб берувчи корхона қоплаган», — деди компания бошқарувчиси.

Ражабовнинг таъкидлашича, яна бир ҳолатда, яъни Lacetti ва Nexia’да автомат узатгичнинг ричаги ўйнаб қолиши ҳақида интернетда тарқалган хабарлар ўрганиб чиқилган.

«Биз уни ўрганиб, муаммо қаерда эканига аниқлик киритдик. Автомат узатгич ричагини ишлаб чиқарган корхона айбдор бўлиб чиқди. Аниқлашимизча, бизга ушбу ричагни етказиб берувчи Кореядаги ишлаб чиқарувчи корхона жараённи нотўғри бажарган. Шу партияда 8 мингдан ортиқ автомобиль сотилган эди. Биз барча мижозларга ўз ҳисобимиздан носоз қисмни янгисига алмаштириб бердик», — деди у.

Компания раҳбари айнан қайси номдаги ишлаб чиқарувчилар носоз автомобиль қисмларини етказиб берганини айтолмаслигини қўшимча қилди.

Аввалроқ Ўзбекистонда Spark, Nexia, Cobalt ва Lacetti хариди учун шартнома бериш 3 мартдан қайта тикланиши, Ўзбекистонда Chevrolet Onix 9—12 минг доллар атрофида сотилиши кутилаётгани ҳамда UzAuto Motors Lacetti’нинг янги Redline моделини ишлаб чиқаришни бошлагани ҳақида хабар берилган эди. Шунингдек. UzAuto Motors компанияси барча автомобиллар нархини пасайтириш устида ишланаётганини маълум қилган.