Еврокомиссия қатъий шартли маркетинг рухсатномалари ўрнига, коронавирус вакциналарини шошилинч маъқуллаш имкониятини кўриб чиқмоқда. Бу ҳақда Reuters нашрига таяниб «Korrespondent.net» хабар берди.
Ўзгаришлар Европа Иттифоқи раҳбарияти ва блокнинг дори-дармонларни тартибга солувчиларига нисбатан тобора ортиб бораётган босим билан боғлиқ. Чунки вакциналарни тасдиқлаш жараёнининг секинлиги эмлаш кампаниясининг амалга ошишини АҚШ ва Буюк Британиядагига нисбатан сусайтириши мумкин.
«Биз аъзо давлатлар билан вакцинани тасдиқлашни тезлаштиришнинг барча эҳтимолий усулларини муҳокама қилишга тайёрмиз», — деди комиссия вакили Еврокомиссия президенти Урсула фон дер Ляйен билан учрашувда бўлиб ўтган ушбу масала муҳокамасидан сўнг.
«Шу ўринда вакцинани Европа Иттифоқида фавқулодда тасдиқлаш бўйича аъзо давлатлар ўртасида жавобгарликни тақсимлаш мақбул ечимлардан бири бўлиши мумкин», — деб қўшимча қилди комиссия вакили.
Европа Иттифоқи ҳукуматлари бундай фикрни қўллаб-қувватласа, ушбу масала бўйича амалий чоралар тез орада бошланиши мумкин.
Маълумот учун, COVAX дастури ёз фаслигача 142 та давлатга 240 миллион доза вакцина етказиб беради. Давлатлар AstraZeneca вакцинасининг 237 миллион, Pfizer вакцинасининг 1,2 миллион дозасини қабул қилиб олади.
Аввалроқ Европа Иттифоқида вакцинация сертификатлари жорий этилиши ҳақида хабар берилган эди.
Изоҳ (0)