Пурвиқор тоғлар, шаршара ва соатлаб қараб ҳам кишининг кўзи тўймайдиган манзаралардан ташқари, Лотин Америкасида диққатга сазовор ҳудудлар, маскан ва бинолар мавжуд.
Испан тилидан «тонгги қуёш» деб таржима қилинадиган геотермал ҳудуд — Сол-де-Маняна денгиз сатҳидан 4800 метр баландликда жойлашган. Алтиплано-Пуна вулканик комплексининг бир қисми ҳисобланган мазкур ҳудудда лойли кўл ва кўплаб ҳовузларни учратиш мумкин.
Мазкур ҳудудда астек ва инкларнинг авлодлари европалик мустамлакачилар ҳамда африкаликлар билан аралашгани сингари аҳоли маданиятида ҳам ранг-барангликни кўриш мумкин. Шу боис карнавал, костюм ва рақслар Колумбия, Боливия ҳамда Бразилия сингари мамлакатларнинг асосий диққатга сазовор жиҳатларидан бири ҳисобланади.
Андага йўл олган сайёҳ маҳаллий аҳолидан кўра кўпроқ лама ва алпакларга дуч келиши мумкин. Бундан 6000 йил аввал перуликлар томонидан қўлга ўргатилган мазкур ҳайвонлар бугунги кунда Жанубий Американинг баланд тоғли ҳудудлари, хусусан, Перу, Эквадор, Чили ва Боливияда фаол равишда кўпайтирилади.
Торрес-дел-Пайне эса сайёҳлар Патогония руҳини ҳис қилиши мумкин бўлган Чилининг баланд тоғли ҳудудида жойлашган миллий боғ саналади. Иқлими мўътадил бўлган мазкур ерда ҳатто ёз ойларида ҳам ҳаво ҳарорати камдан кам ҳолларда 11 даражадан юқорига кўтарилади.
Ушбу ҳудудда баландлиги 2000 метрни ташкил қиладиган улуғвор Куэрнос-дел-Пайне қояларини томоша қилиш мумкин.
Яқин-яқингача дунёдаги энг қуруқ дея ҳисобланувчи Атакама саҳросига 4 асрдан кўпроқ вақт давомида ёмғир ёғмаган. Аммо сўнгги 10 йилда иқлим ўзгариши сабаб Атакамада 200 турдан ортиқ ўсимлик ўсиб чиққан. Чили шимолида жойлашган Атакама саҳросида ер остидан чиқиб турган 11 метрли қўл мавжуд. У 1992 йилда қум орасида чўкаётган инсоннинг заиф ва иложсиз эканлиги рамзи сифати қурилган.
2017 йилда Лома-Грандега ташриф буюрган сайёҳлар палмалар ўртасида турган самолётларни кўриб ҳайратланиши мумкин бўлган, аммо бугунги кунга келиб шаҳар меҳмонлари деразасидан самолёт кўриниб турадиган, ёнида ҳовузда чўмилиш ва ичида тушлик қилиш имконини берувчи маҳаллий меҳмонхоналарга жойлашиши мумкин.
256 та шаршарадан ташкил топган Игуасу шаршараси Бразилия ва Аргентина чегарасида жойлашган. Шаршаралардан энг баланди 82 метрни ташкил қилади.
Рио-де-Жанейронинг Сугарлоаф тоғидаги канат йўли бундан 100 йил аввал ташкил қилинган бўлиб, ундаги ҳаракатланадиган вагон ичидан тоғ, орол ва океанларнинг гўзал манзарасини томоша қилиш мумкин. Буэнос-Айресда жойлашган Ла-бока тумани ҳам ўзига яраша тарихга эга экани билан диққатга сазовор. Педро-де Мендос, Аргентинанинг пойтахтини айнан мазкур ҳудудда ташкил қилган. Буэнос-Айресдаги биринчи порт ҳам айнан шу ерда бунёд қилинган.
Ла-Бока тарихининг сўнгги босқичи ҳудудга кўчиб келган италиялик иммигрантлар билан боғлиқ. Уларда уйини турли рангга бўяш анъанаси бор. Аксарияти камбағал бўлган маҳаллий аҳолининг бир рангдаги бўёққа пули етмаган ва турли ранглардан фойдаланиб уйларини бўяган.
Лагуна-Колорада кўли эса минераллар сабаб оч пушти рангга эга эканлиги билан ўзига хос. Миллий боғ ҳудудидаги мазкур кўлда нафақат Жеймс фламинголарини, балки ушбу қушнинг бошқа турларини ҳам учратиш мумкин.
Лотин Америкасининг энг қадимий шаҳарларидан бири ҳисобланган Мачу-Пикчуга олимларнинг фикрича, XV аср бошларида инклар томонидан асос солинган. Шаҳар профессор Ҳайрам Бингем томонидан ХХ аср бошларида очилмагунига қадар 4 аср давомида эътибордан четда бўлган. У ерда 180 га яқин тарихий иншоот бор. Ўзгача услубда қурилган ибодатхона, уй, омбор ва расадхоналар шулар жумласидан
Колумбиянинг Вилья-де-Лейва қишлоғида қад кўтарган Терракота уйлари архитектор Октавио Мендос томонидан ўзига хос технология асосида қурилган бўлиб, ундаги барча мебель элементлари гилдан ташкил топган.
Боливиянинг пойтахти Сукре атрофи хушманзара тоғлар билан ўралган, яшил водийда жойлашган. Тор ва сокин кўчаларни ўз ичига оладиган шаҳардаги уйларнинг черепицали томлари қуёш ботаётганда кундузгидан ҳам чиройлироқ кўринади.
Гуахиру дунёдаги энг биринчи кайцёрфинг ўргатиш ташкил қилинган жойлардан бири ҳисобланади. Сайёҳлар бу ерга палмалар билан ўралган кўрфазларда ҳордиқ чиқариш учун ташриф буюради.
Лотин Америкаси ёввойи табиатни суратга туширишни хуш кўрувчилар учун ҳам айни муддао. Бу ерда сиз ноёб ҳайвон ва қушлар: катта тукан, қироллик пингвини, галапагос албатроси (денгиз қуши)ни учратишингиз мумкин.
Перито-Морено музлиги Патагониянинг Аргентина қисмидаги энг қизиқарли сайёҳлик жойларидан бири. Майдони 250 километрни ташкил қиладиган муз платоси дунёдаги учинчи энг катта чучук сув захираси саналади. Тахминан ҳар 5 йилда муз Лаго-Архентино кўлига тушиб, дамба ҳосил қилиши, кўлдаги сув 30 метргача кўтарилиши мумкин.
Изоҳ (0)