Япония бош вазири Ёсихидэ Суга мамлакат Ички ишлар ва коммуникациялар вазирлиги вакиллари билан бўлган кечки овқатда ўғлининг қатнашгани учун кечирим сўради. Бу ҳақда Tokyo Shimbun ахборот нашрига таяниб Tengrinews хабар берди.
Нашр маълумотларига кўра, 2020 йилда Япония Ички ишлар ва коммуникациялар вазирлигининг тўрт раҳбари бош вазир Ёсихидэ Суганинг Tohokushinsha Film телекомпаниясида ишлайдиган тўнғич ўғли билан овқатланган эди. Тахминларга кўра, Сэйго Суга амалдорларнинг овқатланиши учун ҳисобни ўзи тўлаган ва телекомпания билан боғлиқ масалаларни муҳокама қилган.
Аввалроқ Токиода Вазирлар Маҳкамасининг йиғилиши ўтказилиб, унда мансабдор шахсларнинг одоб-ахлоқ қоидаларини бузиш масалалари муҳокама қилинган эди.
«Мансабдор шахсларнинг одоб-ахлоқ қоидаларининг бузилишига олиб келган ҳаракатларида ўғлимнинг иштироки учун узр сўрайман», — деди бош вазир.
Сэйго Суга Tohokushinsha Film телекомпаниясида ишлайди. Унинг фаолият кўрсатиши сунъий йўлдош эшиттириш лицензиясининг мавжудлигига боғлиқ. Бу лицензия Ички ишлар ва коммуникациялар вазирлиги томонидан берилади.
Порталнинг хабар беришича, Сэйго Суга 2016 йилдан бери камида 12 маротаба мансабдорлар билан овқатланиб, уларга совғалар улашган. Амалдаги қонунга кўра, давлат хизматчилари манфаатли шахслардан ҳар қандай совға олиши тақиқланади.
Аввалроқ Япония бош вазири карантин вақтида тунги клубларга кирган амалдорлар учун узр сўрагани ҳақида хабар берилган эди.
Изоҳ (0)