Москванинг «Спартак» клуби ўзбекистонлик ярим ҳимоячи Остон Ўруновни футбол бўйича Россия Премьер Лигаси қайдномасидан чиқариб ташланди. Бу ҳақидаги маълумот Премьер Лига сайтининг тегишли қисмида пайдо бўлди.
2020 йилнинг ёзида «қизил-оқлар» сафига қўшилган 20 ёшли футболчи жамоанинг асосий таркибига кира олмади ва Россия чемпионатининг 2020/21 йилги мавсумида 8 та ўйин ўтказиб, бирорта ҳам гол урмади.
«Спартак»нинг жамоатчилик билан алоқалар департаменти директори Антон Фетисовнинг сўзларига кўра Остон Ўрунов спорт принциплари, мураббийлар штаби ва клубнинг биргаликдаги қарори асосида қайдномадан чиқарилган.
Аввалроқ Ўруновга «Рубин» ва унинг собиқ жамоаси «Уфа» томонидан қизиқиш билдирилаётгани ҳақида хабарлар тарқалганди.
Қайд этилишича, «Спартак» яхши таклиф бўлган тақдирда футболчини сотишга тайёр.
Эслатиб ўтамиз, Ўрунов 2020 йилнинг январида «Уфа» футболчисига айланганди ва 2019/20 йилги мавсумда Россия Премьер Лигасида 10 ўйинда майдонга тушиб, 2 та сариқ карточка олди. Остон ёзги трансфер ойнасида «Уфа»дан 1 миллион евро эвазига пойтахт клубига ўтди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)