Қорақалпоғистон Республикасининг Элликқалъа туманидаги «Таза-бағ» ва «Қирққизобод» ОФЙ ҳудудларида эшаклар «қабристони» аниқланди, деб хабар беради ЎзА.
Маълум қилинишича, сўйилган эшак суяклари 3 та майдонга ташланган. Уларнинг биттасида 55 та эшакнинг қовурғалари борлиги айтилмоқда.
Мазкур ҳодиса 12 февраль куни ижтимоий тармоқларга тарқалган видеотасвирдан кейин аниқланган. Видеотасвирда таъкидланишича, эшаклар одамларга тарқатилаётган бўлиши мумкин. «Агар у ҳайвонот боғларига олиб кетиладиган бўлганида суяклари билан кетиши керак эди. Эшаклар моҳир қассоб томонидан сўйилган-ки, қовурға суякларидан гўштлар силлиқ ажратиб олинган. Қабристонда янги сўйилган эшакларнинг қовурға суякларидан ташқари калласини, қулоқларини кўриш мумкин», — дейилади хабарда.
Видеотасвирда маълумот берилишича, эшак суяклари 2021 йилнинг январь ойидан буён 3 маротаба олиб келиб ташланган.
Элликқалъа тумани Санитария-эпидемиологик осойишталик ва жамоат саломатлиги бўлими, ветеринария ва чорвачиликни ривожлантириш бўлими, ҳайвонлар касалликларини аниқлаш, озиқ-овқат маҳсулотлари хавфсизлиги ва Давлат маркази мутахассислари тумандаги барча гўшт дўконларида текширувлар ўтказган. Туман аҳолиси ўртасида эшак сотиб олишни сўраган ва сотиб олган фуқаролар ҳақида суриштирув ишлари бошланган. «Лекин ҳозиргача эшаклар нима мақсадда сўйилганлиги бўйича маълумот йўқ», — дейилади хабарда.
Элликқалъа тумани Санитария-эпидемиологик осойишталик ва жамоат саломатлиги бўлими тумандаги гўшт дўконларида асосан қора мол гўшти сотилишини, қора моллар эса «Элликқалъа» ОФЙ ҳудудидаги кушхонада сўйилишини маълум қилган.
Ҳозирда кушхона ва тумандаги гўшт дўконларида сотилаётган гўштларнинг яроқлилик маълумотномаси ва гўштга қўйилган клеймолари мавжуд эканлиги ўрганилмоқда.
Мазкур ҳодиса юзасидан туман ҳокимлигига, прокуратурасига ва ички ишлар бўлимига ҳам мурожаат қилинган.
Аввалроқ ижтимоий тармоқларда Марғилон ва Қўқон шаҳарларида мушук гўшти ва ундан тайёрланган таомларни сотган уддабурон тадбиркорлар қўлга олингани тўғрисидаги хабарлар тарқалганди. Кейинроқ Фарғона вилоят Ветеринария ва чорвачиликни ривожлантириш бошқармаси ижтимоий тармоқларда тарқатилган хабарлар асоссиз ва нотўғри эканлигини маълум қилган.
Изоҳ (0)