«Агробанк» Турк Эксимбанки билан узоқ муддатли кредит келишувини имзолади

Бугунги кунда республикада амалга оширилаётган ислоҳотлар инвестиция муҳитига ҳам ижобий таъсир кўрсатмоқда.

Коронавирус пандемияси халқаро шериклар билан тўлақонли алоқа қилиш имкониятини чеклаган ва карантин талабларига мослашиш заруриятини талаб этаётганига қарамай, чет эллик ҳамкорларнинг Ўзбекистонга бўлган қизиқиши пасайганича йўқ. «Агробанк» ва Турк Эксимбанки билан ўзаро молиявий ҳамкорлик келишуви бунга яққол мисолдир.

Мазкур онлайн маросимда «Агробанк» умумий қиймати 25 миллион АҚШ долларига тенг кредит шартномасини имзолади.

Шуни таъкидлаш жоизки, банк учун бу тарихий воқеа ҳисобланади, чунки бу шундай нуфузли молия муассасаси —  Турк Эксимбанки билан тузилган илк битим. Туркия технологиялари бизнинг бозорда ўзининг афзал жиҳатларини намоён этгани ва нарх, сифат талабларига жавоб беришини ҳисобга олиб, уларга бўлган талаб ошмоқда. Демак, бу уларни молиялаштириш манбаларига бўлган талабни пайдо қилмоқда.

Бугун ҳар икки банк томонидан қўйилган пойдевор банк соҳасида ҳар томонлама ҳамкорликни ривожлантириш имконини беради.

Ушбу кредит маблағларини муваффақиятли ўзлаштириш кўплаб инвестиция лойиҳаларини амалга ошириш ва республиканинг иш ўринларига муҳтож ҳудудларида қўшимча иш ўринларини ташкил қилишга ёрдам беради.

Реклама ҳуқуқи асосида.