«Ўзбекистонда миссионерлик фаолияти бежиз тақиқланмаган» — Адлия вазири яқин тарихдаги диний эркинликларни чеклаш билан боғлиқ муаммолар ҳақида

Бугунги кунда Ўзбекистонда 2100 та исломий ташкилот, 191 та ноисломий диний ташкилот мавжуд. Бошқа динларга эътиқод қиладиган диний озчиликка мансублар сони 1,5 миллион нафарга яқин бўлиб, улар ҳам Ўзбекистон фуқаролари ҳисобланади. Бу ҳақда 15 февраль, душанба куни адлия вазири иштирокида ўтказилган матбуот анжуманида таъкидлаб ўтилди, дея хабар бермоқда «Дарё» мухбири.

«Виждон эркинлиги, диний эркинликлар бўйича Ўзбекистоннинг ютуқларини эътироф этишимиз керак. Виждон эркинлиги бўлганидан кейин биз нафақат Ислом дини билан боғлиқ бўлган ҳуқуқларни, балки ноисломий қатламнинг ҳуқуқларини ҳам таъминлашимиз лозим. Бу давлат сифатида олдимизда турган энг катта вазифалардан биттаси. Чунки виждон эркинлиги ҳуқуқи — бу Конституция бўйича ҳамма фуқароларга берилган.

Битта рақамни айтаман: Ўзбекистоннинг 4 минг нафар фуқароси ноисломий диний ташкилотлар аъзоси. Ёки кўпларининг умуман динга бўлган муносабати бошқача, ҳеч қанақа муносабат йўқ. Бу тўғридан-тўғри қонунда ёзилган кафолат. Шунинг учун Адлия вазирлиги сифатида ҳуқуқий нуқтаи назардан айтишимиз керакки, битта диннинг иккинчи динга нисбатан ҳеч қандай адовати бўлмаслиги керак.

Бизда миссионерлик фаолияти, прозелитизм бежиз тақиқланмаган. Нима учун бундай қилинган? Биринчидан, бу диний бағрикенглик, толерантлик бўлиши учун қилинган. Иккинчидан, кимнингдир диний қарашларини иккинчи одамга тазйиқ орқали сингдирилишига умуман йўл қўйилмайди ва давлат сифатида биз буни таъминлаб беришимиз керак. Чунки чет элликлар ҳам ўзаро суҳбатларимизда шу ҳақда айтишади», — деди у.

Давлетов ўз нутқида мамалакатдаги мусулмонларнинг диний ҳақ-ҳуқуқларини таъминлаш бўйича кўплаб эркинликлар берилганини қайд этди.

«Ўзбекистон халқининг 90 фоизи мусулмон, мусулмонларнинг диний ҳақ-ҳуқуқларини таъминлаш бўйича кўплаб эркинликлар берилди. Биласизлар, ‘ибодат либоси’ деб қанча чалкашликларга йўл қўйилганди, [рўмол ёки ҳижобда] жамоат жойида юриш бўйича қандай муаммолар бор эди, маъмурий жавобгарликка тортиларди... Ҳозир булар кўпчиликнинг эсидан чиқиб кетган, лекин яқин тарихимизда шу муаммоларнинг барчаси бор эди. Бугун бу муаммолар йўқ.

Шу билан бирга, бошқа йўналишларда ҳам биз умуман дунёвий давлат нуқтаи назаридан ана шу ҳуқуқларни таъминлаб беришимиз шарт. Адлия вазирлиги мана шу дунёвийлик принципи бўйича ҳар бир шахснинг диний ҳуқуқларини, шахсий ҳуқуқ ва эркинликларини таъминлаш бўйича ишларини, албатта, давом эттиради», — деди адлия вазири.