Бир актёр ҳам ижобий, ҳам салбий ролни ижро этган ҳинд фильмлари (фото)

Болливуд картиналари томошабинни бутунлай ҳайратга солиши табиий: ажойиб қаҳрамон ва диалоглар, ёқимли рақс ва қўшиқ ёки кутилмаган якун. Шу билан битта актёр ижобий ва салбий ролларни ижро этган кинолари алоҳида қизиқиш уйғотади.

«Қиёфадош» фильмидаги Шоҳрух Хон

Фильмдаги содда йигит Баблу меҳмонхонанинг бош ошпазига айланишни орзу қилади. Шунинг учун ҳам уларнинг бирига ишга жойлашади. У ерда меҳмонхона бошқарувчиси Сонани учратади. Аммо муаммо шундаки, Баблу икки томчи сувдек ўхшаш қамоқдан қочиб кетган қароқчи Мануга ўхшайди. Бундан хабар топган Ману Баблунинг ўрнини эгаллашга ҳаракат қилади ва шу тариқа полициядан яширинади.

Фильм премьераси 1998 йилда бўлиб ўтган. Ўша вақтгача Шоҳрух Хон романтик роллар ижрочиси сифатида танилган эди. Шунинг учун ҳам унинг жиноятчи сифатида кўриниши томошабин учун янгилик бўлди. Яна шунга ўхшаш ҳолатни «Мухлис» фильмида ҳам кўриш мумкин. Ушбу картинада мухлис ўзининг севимли хонандасига ниҳоятда ўхшаш. Аммо фильм сценарийсига кўра иккала образ ҳам салбий характерга эга.

«Робот» фильмидаги Ражиникант

Доктор Васигаран яратган ноёб робот жанг қилади, қўшиқ куйлайди, рақсга тушади, оловга чидамли ҳамда сув ўтказмайди. У инсон қила оладиган барча ишни амалга оширади. Роботнинг исми Читти. Бир куни Васи унга инсоний ҳис-туйғуларни қўшишга қарор қилади. Шундан сўнг робот Васининг келинини севиб қолади.

Айтганча, робот олимнинг ўзига ўхшаш тарзда яратилгани учун иккисини ҳам Ражиникант исмли актёр ижро этган. Шуни таъкидлаш керакки, фильм Болливудда эмас, балки Колливудда суратга олинган.

«Тинчимаган эгизаклар» фильмидаги Говинда

Говинда ўзини истеъдодли комик актёр сифатида намоён қилган. У «Тинчимаган эгизаклар» фильмида томошабинни бошидан охиригача кулдиришига тўғри келган бўлсада, салбий ролни ҳам ижро этиши керак бўлган.

Шер Сингх – танилиш ниятида Мумбайга келган ёш сценарийнавис. Аммо у дастлаб автосалонда ишлашга мажбур бўлади. Мумбайда қаҳрамон бой оиланинг қизи Ниша билан учрашади. Шер ўзини Шекхар деб таништиради. Жуфтлик турмуш қуришга қарор қилганидан сўнг йигитнинг онаси ўғлини қишлоққа чақиради. Қишлоққа борган Шер синглисини турмушга чиқаётганини билади, аммо куёв шарт қўйган эди: унга кўра, Шер ёшлигида куёвнинг опаси унаштирилган Свитига уйланиши керак эди. Шернинг олдида икки йўл синглисининг бахти ва Ниша турар эди. У биринчисини танлайди ва шаҳарга қайтганидан сўнг Нишани отасининг дўстининг ўғлига мажбурлаб узатаётганини билади. Ниша Шер билан турмуш қуришни, акс ҳолда ўзини ўлдириш билан қўрқитади. Натижада Шер икки оилали эркакка айланади. Кўп ўтмай икки аёл ҳам ўғил кўради. Воқеалар давомини билиш учун фильмни албатта, томоша қилиш керак.

«Миллионернинг қизига уйланмоқчиман» фильмидаги Пареш Ревал

Амир Хон ва Салмон Хон Ҳиндистонга миллионлаб бойликка эга келин келаётгани ҳақидаги мақолани ўқиб қолади. Қаҳрамонлар икки қизнинг жойларини ҳазиллашиб аламштиришга қарор қилади. Уларнинг бири Равина – миллионернинг қизи, иккинчиси Каришма – унинг дугонаси бўлиб чиқади.

Пареш Равал фильмда икки эгизак ролини ажойиб тарзда ижро этган. Биринчиси Рам Гопал Бажаж ва иккинчиси ёвуз Тежа. Тежа бойликка эришиш учун акасини ўғирлаб кетади ва фильм давомида барчани алдайди, чунки эгизакларни ҳеч ким ажарата олмас эди.