Олий ва ўрта махсус таълим вазири Абдуқодир Тошқуловнинг айтишича, тизимни ислоҳ қилиш учун уч ой муддат кифоя қилади. «Gazeta.uz»нинг ёзишича, бу ҳақда вазир ёпиқ тарзда ўтказилган йиғилишда айтиб ўтган бўлиб, унинг фикрлари акс этган аудио ёзув YouTube’га жойланди.
«Биринчи йиғилишда мен қоғозни камайтиришни айтдим. Ҳали эришганимиз йўқ бунга, энди эришамиз. 3 ойдан кейин ректор иложи борича қўлига қоғоз ушламайди, электрон бўлади. Электрон имзо билан кетади. Умуман олий таълим муассасасида нима ёқмаган бўлса, нимадан қийналган ва нима эриш туюлган бўлса ҳаммаси ислоҳ бўлади. Бизга атиги уч ой керак бўлади», — деб таъкидлаган Тошқулов.
«Вазирлик билан интеграция жуда паст ва суст. ОТМ ректори ёрдамчиси вазир ёрдамчиси билан қарийб гаплашмайди. Бугун мен вазирликда хоналарни айландим, халқаро бўлимга кирдим. ‘Нечта олий таълим муассасангизда бу бўлимда вакансия бор’ десам билмайди. Нимани билади? Нима иш билан шуғулланади? Умуман шундай тизим бўлади — вазирлик ОТМлар аҳволини сўраб туради. Керак бўлса, ҳар куни ахборот берасизлар. Вазият қандай, COVID билан касалланганлар йўқми, қурилиш бўлаётган бўлса, у қандай кетяпти, дарс сифати қанақа — бугундан бошлаб мониторинг қиламиз», — деган у.
Абдуқодир Тошқулов, шунингдек, ОТМ раҳбарлари маҳаллий ҳокимликдаги йиғилишларга жалб қилиниши масаласига ҳам тўхталган.
«Қайси вилоятда қайси ОТМларимиз бир ҳафта мобайнида неча марта неча соат йиғилишга боряпти, буни ҳам қонуний ҳал қилиб берамиз. Тизимни сал қаддини кўтариб олиш керак», — деган ОТМ вазири.
Аввалроқ Абдуқодир Тошқулов вазифасига совуққонлик билан ёндашган бир қатор ректорларни танқид қилгани ҳақида хабар берилган эди.
Эслатиб ўтамиз, Термиз давлат университети ректори лавозимида ишлаб келган Абдуқодир Тошқулов 14 январь куни олий ва ўрта махсус таълим вазири этиб тайинланганди. Шавкат Мирзиёев собиқ олий таълим вазири Иномжон Мажидов (Ўзбекистон Миллий университетига ректор бўлди) тизимда ўзгаришлар қилолмагани учун лавозимидан озод этилганини айтганди.
Изоҳ (0)