Қирғизистон ҳукумати Соғлиқни сақлаш вазирлигига COVID-19 вирусининг учинчи эҳтимолий тўлқинига тайёргарлик кўриш бўйича топшириқ берди. Бу ҳақда ҳукумат матбуот хизматига таяниб «Интерфакс» хабар берди.
«Қирғизистоннинг Соғлиқни сақлаш вазирлигига коронавирус тарқалишининг учинчи тўлқини содир бўлиши эҳтимоли туфайли тўлиқ тайёргарликни таъминлаш вазифаси юклатилди», — дейилади матбуот хизмати хабарида.
Матбуот хизматининг хабар беришича, Қирғизистон бош вазирининг ўринбосари вазифасини бажарувчи Эльвира Сурабалдиева COVID-19 бўйича илмий маслаҳат кенгаши аъзолари билан йиғилиш ўтказди.
«Тиббиёт муассасаларига етарли миқдорда асосий ва захира ётоқларини жойлаштириш, коронавируснинг олдини олиш ва даволаш бўйича мутахассисларни ўқитиш ва қайта тайёрлаш, дори воситалари ва тиббий буюмларнинг етарли захирасини яратиш орқали вируснинг учинчи эҳтимолий тўлқинига тўлиқ тайёр туриш керак», — деди Сурабалдиева.
Унинг сўзларига кўра, Соғлиқни сақлаш вазирлиги келажакда аҳолини коронавирус инфекциясига қарши эмлаш бўйича ишларни давом эттириши керак.
Сўнгги маълумотларга кўра, Қирғизистон ҳудудида 84,5 мингдан ортиқ вирусга чалиниш ҳолати аниқланган бўлиб, уларнинг 80 мингдан зиёди соғайиб кетган, 1412 киши вирус қурбонига айланган.
Мавзуга доир:
- Қирғизистон сақлаш шароитларини таъминлай олмаслиги сабабли Pfizer вакцинасидан воз кечади
- Қозоғистонда коронавирусга чалинганлар сони 167 минг кишидан ошди, Қирғизистонда эса 83 минг кишига яқинлашди
- Қирғизистонда коронавирусдан ўлимлар учун собиқ бош вазирларни жавобгарликка тортишга қарор қилишди
Изоҳ (0)